ЕГЭ гъабхбаъ гьаму йисан фицдар дигиш’валар духьнайкIан? Гьаму ва жара суалариз жавабар туври, «Дагъустан» РИА-йин конференцйир гъахру залиъ РД-йин образованиейин ва илимдин министрин сарпи заместитель Аида Далгатовайи республикайин СМИ-йин вакиларихъди гюрюш кIули гъубхьнийи. Дугъу му серенжемдиъ туву асас мялуматар исихъ жикъиди чап апIурача.
ЕГЭ тувру вахт – 26-пи майилан 1-пи июлизкьан, ОГЭ – 24-пи майилан 1-пи июлизкьан давам хьибди.

Улихьна йисариси дарди, цци ЕГЭ-си, ОГЭ-ра видеокамерйирин гюзчиваликкди кIули гъябгъиди. Му къайда, ОГЭ тувруган бицIидарин аьгъювалариз лайикьлу кьимат дивбан бадали, дапIнайиб ву.
Гъябгъюрайи йисан ЕГЭ тувру баяр-шубарин кьадар 13 агъзуртIан артухъ ву, дурарикан 10 агъзуриинакьан цци мектеб ккудубкIурайидар ву. ОГЭ туврайидарин кьадар 40 агъзуртIан артухъ дубхьна, думу улупуб гъубшу йисандин улупбарихь тевиган, 12 агъзуриинди гизаф ву.

Цци республикайиъ ЕГЭ гъабхру 74 пункт гьязурди а, дурарикан 64 уьмуми образованиейин идарйириъ, дидланра савайи, ЕГЭ туврудариз хулариъра, дустгъариъра пунктар ачмиш апIиди. ОГЭ гъабхру пунктар вари 142 ву.

Урхбан йис ккебгъну кку-дубкIайизкьан, мектебариъ ЕГЭ ва ОГЭ туврударихъди ва дурарин абйир-бабарихъди психология жигьатнаан тялукь ляхин гъабхура. Баяр-шубариз ЕГЭ тувруган, абйир-бабарин умудар кIулиз адагъуз хьибдар кIури, гучIури шулу. Баяр-шубарин уьмриъ сабпи читин вахт улубкьнайган, дурарин кефйир дюрюргъбан бадали, фукьан харжи кьимат гъабхьишра, думу дюз апIуз мумкинвал туврайиваликан ктибтури, гьар йисан вари республикайин абйир-бабарин собрание гъабхуру.
ЕГЭ ва ОГЭ тувбан бадали, уьлкейин вари регионариъ баяр-шубариз сабсдар шартIар яратмиш дапIна, гьарсаб региондин мектебариъ сабсдар китабар гьязур апIура.
2023-пи йисан, ГИА-йин натижйириз лигну, муниципалитетарин главйирихъди, мектебарин директорарихъди кIули гъубху ляхнин натижйир йивиди, гъалатIар ва нукьсанвалар арайиан терг апIбан бадали, къарарар кьабул апIиди.