Уьлкейин 26 региондиан гъулан мяишатдин идарйирин вакилар дуфнайи выставкайин натижйир 19-пи майиъ гъивнийи. Сабпи йишв ва пешкеш вуди машин Калмыкия Республикайиан вуйи «Первомайский» СПК-йиз тувнийи. Волгоградский областдиан вуйи «Племзавод «Ромашковский» СПК ва Ставропол крайиан вуйи «Маныч» кIуру жинснан чарвйир артмиш апIурайи колхоз 2-пи йишван сагьибар гъахьну. Хъа 3-пи йишваз шубуб региондин малдарар лайикьлу гъахьну: Астраханский областдиан вуйи «Лебедь» ООО, Ростовский областдиан вуйи «Элита» КФХ ва Къарачаево-Черкесия Республикайиан вуйи «Жинснан завод «Махар» ООО.

Выставкайиъ жара регионарианси, Дагъустандианра 20 малдарвалин мяишатар ва РД-йин Федеральный гъулан мяишатдин илмарин центр иштирак гъахьну. Жинснан чарвйир артмиш апIурайи республикайин мяишатари выставкайиз Дагъустандин дагълу, Артлухский меринос, Эдильбаевский, Андийский, Тушинский, Лезгинский, Дорпер, Гальский, Лакон ва Кафари Кавказдин йиккунна хьайин жинснан марччарна Зааненский, Нубиан ва да-гъустандин жинснан цIигьар гъахну.
Серенжемдиъ иштирак гъахьи марччар-цIигьарихъди ляхин апIурайи Дагъустандиан вуйи мяишатариз жюрбежюр дережйирин 45 аттестатар тувну, гьадму гьисабнаан 23 аттестат – 1-пи дережайин, 18 аттестат – 2-пи дережайин ва 4 аттестат – 3-пи дережайин.

Мидланра гъайри, Дагъустандин кьюбсан гъулан мяишатдин тешкилатариз выставкайин натижйириинди Гран-при тувну, хъа Хунзах райондин «Знатные люди» СПК-йиз выставкайин варитIан асас пешкеш – машин багъиш гъапIну. Му мяишатдин кIулиъ айи Зиявудин Мягьямедовди чпиз багъиш гъапIу машин СВО-йиъ женг гъабхурайи ватанагьлийириз хътапIбан къарар адабгъну.
«Урусатди Украинайин аьтрафариин кIули гъабхурайи хусуси метлеб айи дявдин операцияйиъ ич райондиан 500 эскри Ватандин улихь чпин вазифа тамам апIура. Гьадрарикан 48 кас йиз гъул’ан вуйиз. Ич мяишатдиз айи машин учуз чIяаьн вучуз. Гъи му машин учузтIан, хусуси метлеб айи дявдин операцияйиъ иштирак шули, чпин улихь дивнайи вазифйир тамам апIурайи баяриз чарасуз лазим ву. Гьаддиз узу му машин гьадрариз бахш апIураза», – гъапну Зиявудин Мягьямедовди.

Дагъустандиъ кIули гъубшу вари Урусатдин жинснан марччаринна цIигьарин XXIII выставкайиз дидиъ иштирак шулайи вари регионариан гъулан мяишатарин министрар ва жара улихь-кIулихь хьайи гъуллугъчйир дуфнайи. Выставкайин дахилнаъди Дагъустандин гъулан мяишатдин ва ипIру-убхъру сурсатарин министерствойи, гьамусдихъантина сатIиди ляхин апIбан бадали, Астраханский областдихъди, Ставрополский ва Забайкальский краярихъди, Крым, Калмыкия, Кабардино-Балкария ва Бурятия республикйирихъди йикьрар гъийитIну.
Выставка кIули гъубшу йигъари Дагъустандиз дуфнайи Урусатдин мар-ччлихънарин милли союздин президент, академик Харон Амерхановди мялум гъапIганси, 23 йисандин арайиъ вари Урусатдин маччаринна цIигьарин выставкйир кIули гъахури, мициб заан дережайин тешкиллувал зат гъабхьундар.

«Гьаму йигъари Дагъустандиъ тешкил дапIнайибсиб выставка сарун текрар апIуз шул кIури, хиял дариз. Выставкайихьна вуйи гьязурлугвал, дидин тешкиллувал, мина улупуз духнайи чарвйирин жинсар ва эксперттарин комиссияйи гъабхурайи ляхин – вари заан дережайиъди ву. Гьамциб выставка тешкил гъапIу республикайин улихь-кIулихь хьайидариз, вари гъулан мяишатдин министерствойиз чухсагъул мялум апIураза», – гъапну Харон Амерхановди.

Выставкайин дахилнаъди гъулан мяишатдин цирклиъ ляхин апIурайи касарра республикайин Правительствойин терефнаан лишанлу гъапIну. Гьадрарин арайиъ респуб-ликайин гъулан мяишатдин ва ипIру-убхъру сурсатарин министрин сарпи заместитель Шарип Шариповра а. Серенжемдиъ дугъаз Аьбдулмуслим Аьбдулмуслимовди республика-йин Правительствойин терефнаан Гьюрматнан грамота тувну.

Шарип Шарипов саб гьаму серенжемдиъ ваъ, хъа гъулан мяишатдин цирклин гьарсаб серенжемдиъ аьшкьниинди иштирак шулайи кас ву. Выставкайин гьякьнаан дугъура чан фикрар «Табасарандин нурар» газатдиз ачухъ гъапIну.

«Гъи ухьухьна дуфнайи, йисариинди гъулан мяишатдин цирклиъ лихурайи пишекрари вариди, йикьрар дапIнайидариси, мициб выставка гьелелиг гъабхьундар кIура. Серенжем дурариз вари терефариан кьабул дубхьна. Выставкайихьна респуб-лика лап кIваантIан гьязур гъабхьну. Гьарсаб апIурайи гьязурлагвалин ляхин, республикайин Глава Сергей Меликовдин тIалабниинди, региондин Правительствойин председателин гюзчиваликкди кIули гъубшну. Чарвйирин кьадарниинди Урусатдин кIакIначи регион вуйивализ лигну, Дагъустандихьан выставкайиз дуфнайи хялар мюгьтал апIуз гъабхьну. Дурари вариди гьамци заан дережа-йиъди вари тешкил апIбаз ва чпи гьюрматниинди кьабул апIбаз Дагъустандиз аьхю чухсагъул кIура.
Мина Урусатдин регионариан гъулан мяишатарин 15-тIан артухъ министрар, губернаторар дуфна. Дурари анжагъ саб малдарвалин цирклиъ ваъ, хъа республикайин гъулан мяишатдин имбуну цирклариъра сатIиди ляхин апIуз регионарин арайиъ вуйи йикьрар гъийитIну. Мициб гьелелиг гъабхьиб дар – саб жюрейин серенжемдиъ швнуб-саб терефариан йикьрар йитIувал. Гъи Дагъустандиъ айи гъулан мяишатдин илмарин вакиларира ужудар «шибритIар» ирчра. Гьаддиз ихь региондихъди ляхин апIуз ккунидарин кьадар йигълан-йигъаз артухъ шула», – гъапну Шарип Шариповди.

Выставкайиъ иштирак шулайи дагъустандин чарвйирин гьякьнаан дугъу гъапиганси, марчч, цIигь – мурар сивар-галариъ чру укI ипIури ккуни гьяйванатар ву. Гьаддиз ихь чарвйирин йиккра варитIан ицци тIяаьмнанубси гьисаб апIура.
«Ихь сивариъ 300-400 жюрейин жюрбежюр укI-кьал айихь. Гьациб ипIруб ипIури, марцци, дагъдин булагъарин шид убхъури уьрхюрайи ча-рвйирин йикк ицциб дархьуб мумкин дар. Гьаддиз Дагъустандин чарвйирин йикк урусатдин брендси гьисаб апIура ва гьаммишан ихь чарвйирин йиккуз муштарйирра гизаф а. Хъа муштарйир имбукьан гьахьди, дагъустандин жинснан чарвйирин артиш’вал кам даршул», – аьлава гъапIну министрин заместители.