Сессияйиъ гьял апIбан бадали 23 месэла адагънайи. Гьадрарикан саб Халкьдин Собраниейин промышленностдин, яшамиш шлу хуларин ва коммунальный мяишатдин, транспортдин ва рякъярин мяишатдин комитетдин председатель ктагъбахъди аьлакьалу вуйи. Улихьди му комитетдин кIулиъ айи председатель Юсуп Умавов Мягьячгъала шагьрин мэрин вазифйир тамам апIрурди тяйин гъапIну. Халкьдин Собраниейин депутатари думу комитетдин председателди, РД-йин Халкьдин Собраниейин бюджетдин, финансарин ва налогарин комитетдин председателин гъуллугънахьан азад дапIну, Алавудин Мирзабалаев ктагъну.

Алавудин Несрединович, «Таба-сарандин нурар» газатдин редакцияйин коллективди, уву цIийи гъуллугънаъ тяйин апIувал кIваантIан тебрик апIури, увуз жандин мюгькам сагъ’вал, халкьдин яшайишдин артмиш’валин месэлйир гьял апIбаъ заан хъуркьувалар, халкь увкан, хъа уву халкьдикан гьарган разиди гъузувал ккун апIура.
Редакцияйин коллектив