2019-пи йисан 20-пи мартдиъ РД-йин Глава В.Васильев РД-йин Халкьдин Собраниейихьна илтIикIбахъди аьлакьалу РД-йин Правительствойин табшуругъар тамам апIури, зиихъ къайд дапIнайи месэлара ихь республикайиъ гьял апIбан бадали, цци Дагъустандин бюджетдиан 300 миллион манат жара дапIна. Думу пул, инвалид касариз ипотекайин кредитдиинди яшайишдин хал масу гъадабгъруган, сабпи ражари вуди тувну ккунди пулин дакьатар тувуз кюмек хьпан бадали, ясана жвуван пулихъ хал масу гъадабгъруган, дицдар касариз саб кьадар кюмек ибшри кIури, субсидйир жюрейиинди туврайиб ву. Гьамдихъди аьлакьалу вуди 2019-пи йисан 22-пи майдиъ РД-йин Правительствойи, 1-пи группайин инвалидарин хизанариз ва инвалид бицIидар айи хизанариз яшайишдин хулар гъадагъуз кюмек хьпан бадали, пулин дакьатарин кюмек апIбан гьякьнаан 112-пи нумрайиккди къарар кьабул дапIна.

Къайд апIуб лазим вуки, му программайиъ иштирак хьпан бадали, 750 агъзур манаттIан артухъ жвуван дакьатар, ясана банкдиан гъадабгънайи ипотекайин кредитар ади ккунду, дадавалин капиталра ишлетмиш апIуз ихтияр а. Амма, ишлетмиш апIурайи кредит 10 йисазтIан артухъ вахтназ даруб ва вазлин арайиъ 10 агъзур манат тувруб дубхьну ккунду. Хъа гьюкумматдин терефнаан яшайишдин шартIан ужу апIуз туврайи кюмекнан кьадар 1 миллионна 652 агъзур манаттан артухъ дубхьну ккундар.

Мялум вуйиганси, гьюкуматдин терефнаан субсидйирин кюмек ккун апIури, илтIикIуз ихтияр айи хизанарин аьхюнубсиб пай хьур ва хьуртIан артухъ касар яшамиш шулайидар ву.

Гьаму жюрейин кюмек лайикь вуйи касарихьан 1-пи июндиан 1-пи августдизкьан РД-йин тикилишчивалинна архитектурайин ва ЖКХ-йин Министерствойиз чпин аьрзйир тувуз шулу. Хъа августдин вазлихъан минис-терствойиз гъафи аьрзйир тартиб апIуз ва яшайишдин хуларин гьякьнаан Шагьадатнамйир тувуз планалмиш дапIна. Гьюкуматдин терефнаан субсидйир гъадагъу касари, яшайишдин хулар масу гъадагъбан бадали, Шагьадатнама чпин хилиз тувбан кьяляхъ, РД-йин деъру хулар масу тувру рынокдиъ масу тувбан-гъадабгъбан къайдайиъ улупнайиганси, физический вая юридический касарихъди йикьрар йитIну, йикьрар йитIбан думу кагъзар гьадму ляхнариз лигру органдиз тувру. Ва улупнайи тешкилатди анжагъ гьадмугантIан субсидйир хулар масу гъадагъурайи касарин гьисабназ илтIикIудар.

Эгер фукIа гъавриъ адрахъуб аш ясана учвуз артухъдиси мялуматар лазим вуш, ва гьацира субсидйир гъадагъбан бадали фицдар документар ккундуш, гьаму вари мялуматар РД-йин тикилишчивалинна архитектурайин ва ЖКХ-йин Министерствойин сайтдиъ чап дапIна.