Улихьна йигъари Хив райондин глава Ярмет Ярметов, дугъан заместитель Агъамирзе Гьямзабегов ва райондин гъулан мяишатдин управлениейин начальник Байрамбег Кучув райондиъ ургурайи хутIлариз гъушну.

«Табасарандин нурар» газатдиз Байрамбег Кучувди туву мялуматариинди, цци Хив райондиъ 600 гектар хутIлар, саб гектариан 15-20 центнер тахил ккадабцIури, ургуз гьязурди а.

Дугъан гафариинди, хутI-лар ургбаъ 3 комбайнди ляхин апIура, яна, пуз шулуки, техникайин гьякьнаан райондиъ читинвалар адар.

Хив райондин глава игнар ургурайи «Ярак» КФХ, «Мисриханов» тешкилатдиз, «Юзбековский» СПК-йиз ва «Кандик» СПК-йиз гъушнийи ва душваъ гъягъюрайи ляхнарихъди таниш гъахьнийи. Главайихъди вуйи гюрюшдиъ гъулан мяишатдин нежбрари райондин главайиз чпиз ляхниъ алахьурайи читинваларикан мялум гъапIнийи. Гъулан мяишатдин пишекрариз варитIан гизафди алабхъурайи учIру читинвал – тахил уч апIру вахтна хутIлариъ либхурайи техникайиз лазим шлу алатар ва гьацира ГСМ масу гъадабгъуз бицIи кредитар гъадагъувал читинди алабхъурайивал ву. Чан терефнаан райондин главайи му месэла гьял апIуз кюмек апIбан гаф тувну.

Табасаран райондин хутIлариъ чвлин мягьсулар ургбан гьякьнаан райондин гъулан мяишатдин управлениейин начальник Камил Гьяжиевди мялум гъапIганси, цци райондиъ 502 гектарин хутIлар ургиди.

«Гьамусяаьт райондиъ «Къурбанов Назир» ва «Аьбдулмалик Къурбанов» КФХ-йириъ мягьсулар уч апIура. Яна, пуз шулуки, гектариан 30 центнер бегьер уч апIури, гъийин йигъаз 60 гектар хутIлариан 180 тоннайин тахил уч дапIна.

Табасаран райондиъ мягьсулар дурурзрайивалин варитIан асас себеб – лазим вуйи техника адрувал ву», – къайд гъапIнийи Камил Гьяжиевди.

Кьюбиб районариъра кIули гъягъюрайи хьадан гъулан мяишатдин ляхнарикан артухъ мялуматар газатдин гъюру нумрйириъ чап апIидича.