ПОСЛЕДНИЙ НОМЕР
Свежий выпуск
Академик Гьяжи Бучаевди, РД-йин Главайин ва Правительствойин Администрацияйин кIулиъ айирин коррупцияйиз аьксивал улупбан месэлйириз лигру заместитель Гьясан Марачуевди, коррупцияйиз аьксивал улупбан месэлйириз лигру илимдинна методикайин директор Даци Гьяжиевди ва гьацдар жарадари иштирак'вал гъапIу му серенжемдиъ асас доклад хьади РФ-дин илимдин ла йикьлу гъуллугъчи Дмитрий Шестаков удучIвну гъулхнийи. «Тахсиркарвалариз аьксивал улупбан теорияйин бина» ччвур тувнайи чан докладдиъ Д.Шестаковди, тахсиркавралариз аьксивал тешкил апIруган, сифтена-сифте олигархарилан ккебгъну ккунду кIури, къайд гъапIнийи. «Олигархарин аьхю тахсиркарвалари тахсиркарваларин маш-бина тешкил апIуру: дурари гьюкмин органарин сечкйиригъ, уьлкейиъ гьюкум дигиш апIбан гьяракатар тешкил апIувалигъ, рангнан революцйиригъ, дявйир-кчIихбаригъ чпин «лик» гъивру. Варихалкьарин йикьрариз ва уьклейин гьюкмин къарариз кьимат тувру Варихалкьарин уголовный цIийи суд тяйин апIувал лазим ву. Гьадму йикьрар къарарар вари халкьарин ихтиярарин къайдйириз жаваб тувраш ахтармиш апIувалра лазим ву», – гъапну Д.Шестаковди.
Дугъу гьацира Урустадиъ Федералин къанундин терро-ризмдиз аьксивал улупбан гьякьнаан вуйи 7-8-пи маддйириз фикир ва кьимат тувувал лазим вуйиваликанра къайд гъапIнийи. Самолет ясана гими гъибису террористар «хатIасуз» апIру вахтна саб тахсирра ктру инсанар (самолетдиъ, гимийиъ айидар) уьмрихъ мягьрум дарапIбан бадали, гьаддиин ляхин дубхну ккунду.
Серенжемдиъ удучIвну гъулху Даци Гьяжиевди Дагъустандиъ тахсиркарвлар апIбаз аьксивал улупбакан ктибтнийи. Дугъу аьхиримжи 30 йисан Дагъустанди тамам гъапIу уголовныйна инсанарин ихтиярар чIур апIбан тахсиркарвалариз кьимат тувнийи. Тахсиркарваларикан вуйи аьгъювалариз бахш дапIнайи серенежмдиъ А.И.Герцендин ччвурнахъ хъайи РГПУ-йин уголовный ихтиярарин кафедарйин профессор Сергей Милюков, профессор Ханлар Аьликперов, РД-йин прокурорин сарпи заместитель Гьябибуллагь Аьлиев, «Криминология: накь, гъи, закур» журналин кIулин редактор Андрей Данилов ва жарадар удучIвну гъулхнийи.
Гюрюшдин аьхириъ сюгьбатнан иштиракчйири журналистарин ва жара касарин суалариз гьуркIу жавабар тувнийи. Серенежмдин натижйириз лигну, дидин тешкилатчйири РД-йин Главайин ва Правительствойин Администрацияйин Управле-ниейиз, гьял апIбан бадали, коррупцияйиз аьксивал улупбан месэлйирин гьякьнаан теклифар гьязур апIура.