Версия для печати

Хив райондиъ выпускной бал кIули гъубшну

Автор Мейлан Нежефов Пятница, 05 июля 2019, 08:43 81
Хив райондиъ выпускной бал кIули гъубшну
||| ||| |||

Улихьна йигъари Хив райондиъ, Урусатдин жигьиларин Йигъ къайд апIури, выпускной бал кIули гъубшнийи. Дупну ккундуки, му серенжем райондиъ гьар йисан гъабхури шулу. Хъа цIар ккадатури пуз ккундузузки, мукьан яркьуди - сабпи ражари гъубхну. Серенжем кIули гъябгъюрайи райондин культурайин Хулаз Хив райондин вари гъулариан иштагь айи выпускникар, мялимар ва урхурайидарин абйир-бабар уч гъахьнийи.

 

Шадвалин мяракайин асас иштиракчйир Хив райондин главайин заместитель Агъамирзе Гьямзабегов ва райондин образованиейин отделин кIули айи Казбек Къазиев вуйи.

Чпин улхбариъ дурари ЕГЭ-йин натижйириин чпи рази вуйиб улупнийи. Выпускникариз гьарурин кIваъ айи мурад-метлебарихъ хъуркьувал, кадабгънайи рякъюъ ужудар сяътар, ва заан дережайин аьгъюваларикк ккуркьну, ужуб хизан-кюлфетдин эйсйир, район улихь гъябгъру ляхнин устадар хьувал ккун гъапIнийи. «Уьмриъ учву фицдар хъуркьувалар гъазанмиш гъапIишра, жвуваз дарсар киву мялимар, жвув гъюрхю абйир-бабар кIваълан магьарханай ва инсанвалин лишан мудубганай», – тIалаб гъапIнийи выпускникарикан Агъамирзе Гьямзабеговди.

Мубаракнан гафарин кьяляхъ, вариси дарди, мектебдиъ урхбаъ ужудар натижйир айивализ ва чешнелу тербияйиз, хасиятназ лигну, Хив райондиан гъизилин медализ сагьиб гъахьи ЗахитI гъулан кьялан мектебдин выпускник Суна Аллагьвердиева, Хиварин кьялан мектебдин выпускник Диана Къурбалиева ва С.А.Аллагьвердиевдин ччвурнахъ хъайи Ашага АрхътIарин кьялан мектебдин выпускник Фарида Бабаева райондин администрацияйин терефнаан гьюрматнан кагъзариинди лишанлу гъапIнийи.

Мидланра савайи, региондин олимпиадйиринна конкурсарин гъалибчйиризра образованиейин Управлениейин терефнаан грамотйир тувнийи.
Серенжем табасаран ва лезги халкьдин мяълийирин устадарин мяълийирихъди, дидин иштиракчйирин ялхъвнарихъди аьхирихъна гъафнийи.

Оцените материал
(1 Голосовать)