Версия для печати

Яшлуйирин Йигъ

Автор Мейлан Нежефов Четверг, 03 октября 2019, 11:35 17
Яшлуйирин Йигъ Яшлуйирин Йигъ Яшлуйирин Йигъ
||||| ||||| |||||

 

Гъизилин чвлин вахтнахъди саб жерге аку, шадлугънан машкврар улуркьуру. Месела: «Мектебариъ, урхбан мертебйириъ сабпи зенг», «Дагъустандин халкьарин сабвалин Йигъ», «Мялимарин Йигъ», «Духтрин Йигъ», «Вари дадйирин Йигъ» ва хайлин гьацдар жарадар. Гьаму мяракйирин арайиъ «Яшлуйирин Йигъра» а. Вари Урусатдиъ октябрин садпи йигъ яшлуйирин Йигъ вуйиб къайд дапIна.

Аьдат вуйиганси, гьаму йисанра Хив райондин мектебариъ, бицIидарин багъариъ, культурайин хулариъ му йигъ къайд гъапIну. Гьацдар мектебарикан саб Мажвгларин кьялан мектебра вуйи.

Мектебдиъ тешкил дапIнайи линейкайин мажвгларин кьялан мектебдиъ тербияйин ляхниз лигру директорин заместитель Мейлан Нежефовди яшлуйир мектебдин администрацияйин терефнаан му йигъахъди тебрик гъапIнийи.

М.Нежефовди чан улхбаъ серенжемдин асас метлебнакан, мектебдиъ урхурайи баяр-шубарин яшлуйирихьна, кьабидарихьна вуйи янашмиш'вал хатур-гьюрмат уьбхювал заан дережайиндар духьну ккуниваликан мялум гъапIнийи, рякъ-хулиъ алахъу-гьахъу вахтна яшлу касдиз салам тувну, гъудужвну йишв улупну, гьерхуб-хъерхуб дапIну, эгер лазим вуш, жвувура кюмекра апIувал гьарсар живандин буржи вуйиваликан гъапнийи.

Му ражари линейкиина хьур яшлу касар дуфнайи: 82 йис дубхьнайи Сягьибат Гьямидова, 94-йис дубхьнайи Санжа Атлуханова, чан яш 67-йис вуйи Шевлеханум Маллаева, 81-йис вуйи Шюшеханум Аьбдуллаева, 96-йис дубхьнайи Аьлескер Нурадинов. Дурариз серенжемдиз гъюз, дидиъ иштирак хьуз ва хулаз гъягъюз мектебдин завуч Нариман Мирзабеговди кюмек гъапIнийи.

Зиихъ улупнайи яшлу касари урхурайдарихъди чпин деврикан ва гъийин йигъкан гафар-чIалар гъапIнийи. Дурари чпин кIул`ина гъафи йигъар-йишварикан, дердер-гъамарикан, гвачIнин гъипIхъан, лисуз ипIруб дибрихъру вахтарикан, гьаци мугъхьан-тугъхьан ккубкьу алабхьру палатдикан, урхру китабдихъ мюгьтаж духьну, думу дибрихъди гъушу йисарикан ктибтнийи ва гъийин наслариз тувнайи женнетсиб уьмрикан гъулхнийи. Гюрюшдин аьхириъ яшлуйири чпин насларикан ужуди урхувал, урхуб ккудубкIну, илим гъадабгъну, ляхин-карнан, хулан-йишван эйсир хьувал ккун гъапIнийи.

Яшлуйирин улхбарин кьяляхъ, М.Нежефовди вари классарин руководителариз гъябгъюрайи вазлин аьхириз яшлуйири гъапIу гафар-чIалариан, ктибтбариан урхурайдарин арайиъ кIул`инди вуйи шиир, сочинение ва шикил зигуз талитар гъахувал табшуругъ тувнийи.

Ухьуз гьамциб акувал улупуз дурари чпин уьмур фида гъапIну. Деуз йишв, дахъуз мажал, ипIуз уьл адарди, дурари фукьан-вушра цIуз гъизигну. Гъит, ухьу дурари гъизигу зегьмет гъядапIру агьларикан даришри! Ухьу дурарин гъайгъушнаъ айи агьларикан ишри! Ихь вари яшлу касариз кьаби-кьюци хьайиз албагу, берекетлу хизандин арайиъ ярхи уьмур ибшри!

Оцените материал
(1 Голосовать)
1