Версия для печати

FCA-йин турнирин гъалибчйир

Автор Наргиз Гюлечова Пятница, 01 ноября 2019, 13:03 89
FCA-йин турнирин гъалибчйир
||| ||| |||

 

 

 

Октябрин 25-пи йигъан Дербент шагьрин «Нарын-Гъала» стадиондиин Дагъустандиъ сабпи ражари вуди FCA тешкилатди тешкил дапIнайи MMA жюрейин спортдин турнир кIули гъубшну. Думу турнир Калининград шагьриъ яшамиш шулайи Табасаран райондин Хянягъ гъулан агьали, FCA Федерацияйин президент Вадим Аслановди тешкил гъапIуб ву.

 

Турнириъ вари дюн'яйиз машгьур вуйи хайлин спортсменар иштирак гъахьнийи. Гьадарин арайиъ ихь халкьдин машгьур вакилар Назим, Багьаудин ва Рягьман Абасовар, Мягьямед Халибегов, Закарья Кьадиров, Муса Рамазанов ва жарадар айи. Гьяйифки, турнириъ Закарьяйихьан гъалиб хьуз гъабхьундар. Хъа имбуну ихь баяр кчIихбариъ гъалиб гъахьну.

Турнирин тешкилатчи Вадим Аслановдин гафариинди, дугъаз, учв Кьибла Дагъустандиан вуйивализ лигну, ухдитIан мушваъ турнир тешкил апIуз ккунди айи. Гьаддиз дугъу му турнир Дербентдин стадиондиин гъабхуз йикьрар гъапIну.

«Пуз ккундузуз, турнирин гьякьнаан вуйи ич умудар вари кIулиз удучIвну. Талитар заан дережайиъди кIули гъушну.

Спортдин талитариан турнир тешкил апIурайи гьарсаб региондиъ учу рягьимлувалин проектра уьмриз кечирмиш апIурача. Яна, гьарсаб турнир гъабхурайи йишваъ турнириз гъюз масу гъадагъу билетарихъан уч гъахьи пулин дакьатар гъагъи уьзриан иццурайи бицIириз операция апIуз кюмек вуди туврача. Гьаци, магьа Дербент шагьриъра шагьрин администрацияйиан гъагъиди иццурайи бицIирикан мялуматар тувбаз лигну, турнириз лигуз гъафидари билетарихъ туву вари пул гьадгъаз кюмек вуди тувнуча», – гъапнийи Вадим Аслановди.

Гьацира дупну ккундуки, му турнириз дуфнайи, Казахстандиан вуйи ихь ватанагьли Идрис Аьлибеговдира иццурайи бицIириз чан терефнаан пулиинди кюмек гъапIну.

Чан улхуб давам апIури, Вадим Аслановди мялум гъапIганси, ноябрин вазлиъ Каспийск шагьрин Аьли Аьлиевдин ччвурнахъ хъайи спорткомплексдиъра гьамциб турнир гъабхуз планламиш дапIна.

Эгер октябрин 25-пи йигъан гъабхьи турнириъ иштирак гъахьи Назим Абасовдикан кIуруш, думу касди чан спортдин карьера ккудубкIну, хайлин йисар ву. Му ражари «Игит кьяляхъ гъювал» ччвур тувну, дугъаз турнириъ иштирак хьуз мумкинвал тувну. Назимди гьаму ражарира чан гьаргандин кьувват ва кIубанвал улупну.

Оцените материал
(1 Голосовать)