Версия для печати

«WORLD FOLK VISION» фестивалихьна гьязур шула

Автор Наргиз Гюлечова Пятница, 13 декабря 2019, 09:54 69
«WORLD FOLK VISION» фестивалихьна гьязур шула «WORLD FOLK VISION» фестивалихьна гьязур шула
|||| |||| ||||

Улихьна йигъари Дербент шагьриъ ерлешмиш дубхьнайи Лезги театриъ вари дюн'яйин милли культурйиринна искусствойин «WORLD FOLK VISION» фестиваль-конкурсдиз гъягъюз командйир гъядагъбан бадали вуйи конкурсдин Урусатдин милли этап кIули гъубшну.

 

Му серенжемдиъ иштирак хьуз республикайин вари районариан ва шагьрариан яратмиш апIбан коллективар уч гъахьну.
Серенжем фици кIули гъубшнуш, душваъ яратмиш апIбан коллективар фицдар номинацйириъ иштирак гъахьнуш ва вари фестиваликан мялуматар туври, улихьна йигъари республикайин журналистарихъди Евразияйин экономикайин ляхнариъ дуствал апIбан тешкилатдин ва гьаму фестивалин председатель Жанна Барсегова, дугъан заместитель Разита Мушидова ва жара касар гюрюшмиш гъахьну.

Конференция ачмиш апIури, Жанна Барсеговайи мялум гъапIганси, фестивализ иштиракчйир гъядягъбан конкурс жюрбежюр номинацйириан кIули гъубшну. Гьадрарин арайиъ «Ялхъван апIувал», «Мяъли апIувал», «Музыкайин алатариинди мукьмар йивувал», «Декоративно-прикладной искусство» айи. Гьаму номинацйириан финализ удучIву иштиракчйир 7-12-пи январиъ Сочийиъ кIули гъябгъру вари Урусатдин конкурсдин финалиъ иштирак хьиди. Гьадушваъ гъалиб гъахьиш, Урусатдиъ уч дапIнайи командайихъди 23-пи февралиан 5-пи мартдизкьан Саудовский Аравияйин Эр-Рияд шагьриъ кIули гъябгъру вари дюн'яйин «WORLD FOLK VISION» фес-тивалин финалиъ иштирак вал апIиди.

«Гьамусяаьт 90-тIан артухъ уьлкйириъ, вари дюн'яйин «WORLD FOLK VISION» фестивалиъ иштирак хьпан бадали, команда гьязур апIбан, яна яратмиш апIбан коллективарикан уч дапIнайи командйир гъядягъбан конкурсдин милли этапар кIули гъягъюра.

Пуб лазим вуки, фестивалиъ асас вуди харж шулайи вари дакьатар фестиваль чпихь тешкил апIурайи гьюкуматди чаина гъадагъура»,

– мялум гъапIнийи Жанна Барсеговайи.
Дагъустандин яратмиш апIбан коллективарикан улхури, дугъу чан улхбаъ гъапиганси, мушваъ гьарсаб шагьриъси, райондиъси, гъятта гьарсаб гъулаъра кмиди ужудар коллективар а.

Мисал вуди Барсеговайи, сач Урусатдин уч дапIнайи командайин дахилнаъди «WORLD FOLK VISION» фес-тивализ гъубшу Дагъустандин Леваши гъул'ан вуйи «Авадан» ансамбли 1-пи йишв гъадабгъуваликан мялумат тувнийи. Думуган му фестивлиъ 80 гьюкуматдиан яратмиш апIбан коллективар уч гъахьнйи. Цци Сочийиъ кIули гъябгъру фестивализ иштиракчйир гъядагъбан Урусатдин этапдин финалиъ ихь республикайиан «Лезгинка» ансамбль ва Къубачийин устйир иштирак хьиди.

Оцените материал
(2 голосов)