Версия для печати

Табасаран райондиъ ЦIийи йисаз бахш вуйи серенжем  кIули гъубшну

Автор Нуров Ражаб Вторник, 31 декабря 2019, 23:21 90
Табасаран райондиъ ЦIийи йисаз бахш вуйи серенжем  кIули гъубшну
||| ||| |||

 

 

2019-пи йисан 30-пи декабри Хючна гъулан паркдиъ айи бицIидарин майдандиин ЦIийи 2020-пи йисаз бах вуйи серенжем кIули гъубшну.

Уч духьнайи жямяаьтдин улихь Табасаран райондин глава Мягьямед Къурбанов удучIвну гъулхнийи.

«2019-пи йис лап читинуб гъабхьнийи, вушра Табасаран райондиъ саб хайлин ляхнар улихь гъушну. Райондин 90 йисандин юбилей цIийи алапIнайи Ургур чвуччвунна сар чуччун гъалайиин заан дережайиъди кIули гъубшнийи.

Гъи гьацира чухсагъул пуз ккундузуз «150 мектеб» проектдиъ иштирак хьуз кюмек гъапIу гьарсар касдиз, иллагьки спонсорвалин кюмек тувдариз. Думу проектдик Табасаран райондиан 12 мектеб кахьну ва дурар вари цIийи алаъну. «Ерли жягьтлувалар» кIуру проектдикра Табасаран райондииан 12-объект кахьну, тикилишчивалин ляхнар аьхирихъна гъюра.

Цци райондин 30 километр рякъяриин асфальт улубзну вам у метлебариз 300 миллионтIан артухъ пул харж гъапIну. Транспортдихъ тувру налогарин кюмекниинди Хючна гъулаъ Жяфаровдин кючейииъ 660 метр асфальт улубзну. Хъа кIулди кIуруш, 2019-пи йисан райондиъ 13 миллион манат пул налогар уч гъапIну, 2020-пи йисан думу пул гъулариз гъягъру рякъяриз харж апIиди.

Владимир Васильевди Табасаран районди гъягъюрайи ляхнариз ужуб кьимат тувну. 2020-пи йисан райондин саб-швнуб гъулаз шид зигувал планламиш дапIна. Кьюб гъулаъ цIийи мектебар ккергъиди, гьацира 2 бицIидарин багъар.

Хайлин дигиш'валар сагъламвалин цирклиъра кIули гъушну. 2019-пи йисан райондиъ 3 ФАП тикмиш гъапIнийи, 2020-пи йисан цIийидарра  дивиди. Табасаран райондин кьялан больницара цIийи алапIура, Ярса гъулаъ айи аьзарханара цIийи алапIиди. Райондин элетросетариз трансформаторар гьюдюхюз 70 миллион пул деебтна.

 Йискьубан арайиъ кIули гъуху вари ляхнар ктухуз хъюгъиш, гизаф вахт гъябгъиди. Пуз ккундузуз, думу хъуркьувалар вари Табасаран райондиъ айи агьалйирин зегьметнан натижа ву. Варидариз чухсагъул мялум апIураза»,

 

– гъапнийи Мягьямед Къурбаноди ва уч духьнайидар улубкьурайи ЦIийи йисахъди тебрик гъапIнийи.

Серенжемдин дахилнаъди сабсан шаду гьядиса кIули гъубшнийи: райондин мектебариз жара дапIнайи 14 автобусарин жюлегар 14 мектебдин вакиларихьна тувнийи. Автобусар «Глонасс» гъурулушдихъди ва тахографарихъди тямин дапIна. 10 мектебдиз автобусар сабпи ражари вуди  тувнийи, хъа 4 мектебдиз – 10 йисан гъилиху автобусар гьюдюхюз. Автобусарин жюлгер директорариз райондин жюрбежюр цирклариъ гизаф йисари гъилиху ва халкьдин арайиъ гьюрмат гъазанмиш гъапIу яшлу касари тувнийи.

Серенжемдин аьхириъ райондин культурайин хулан гъуллугъчйири ЦIийи йисаз бахш дапIнайи аьхю концертдин программара улупнийи. Аяз Абайина Йифун шуру бицIидариз пешкешар тувнийи.

Оцените материал
(0 голосов)
Последнее изменение Четверг, 02 января 2020 09:39