Версия для печати

Веледариз сарф гъапIу уьмур

Автор Ражаб Нуров Пятница, 03 января 2020, 11:06 523
Веледариз сарф гъапIу уьмур
||| ||| |||

 

Табасаран райондиъ зегьметнан фронтдиъ гъахьи, Аьхю Гъалибвал багахь гъапIу адлу зегьметкешар гизаф а. Гьадрарикан сар Табасаран райондин Кюрягъ гъулаъ яшамиш шулайи Залиха Къурбанялиева ву.

 

Залиха Шихсефиевна Къурбанялиева 1908-пи йисан 8-пи июлиъ Табасаран райондин Гьесихъ гъулаъ нежбрин аьжуз хизандиъ бабкан гъахьну. Гьеле лап бицIидимиди дугъаз гизаф читинвалар алахьну. Шик яшнаъ айи шуру дадайихъди хутIлариъ ляхин апIуз хъюгъну. Алахьру ккурттар ва ипIуз уьлкьан гьуркIну адру вахтар дугъаз гизаф гъяркъну. Ккергъбан мектеб ккудубкIган, Залихайи чпин кьабидариз дяхин дубзну, ахларихъ рягъюз кюмек апIури гъахьну.

Улихьдин заманйирин аьдатариз асас вуди, думу ухди швувазра гъушну. Дугъан сарпи жилир, лихуз гъушур, кечмиш гъахьну, ва жигьил дишагьли чан абайин хулаз кьяляхъ хъадакну гъюру. Дидин кьяляхъ думу Кюрягъ гъул’ан вуйи Ражабяли Къурбанялиевдиз кьюбпи ражну швуваз гъягъюру. Мушваъра дугъаз лап гъагъиди алабхъну – Ватандин Аьхю дяви ккебгъиган, Ражабяли ватан уьбхюз дявдиз гъягъюру. Залиха Къурбанялиева, хилариин бицIидарра алди, хулаъ гъузру. ГвачIниан лавландизкьан хутIлариз ляхин апIуз гъягъюри, дугъу, хизан гаш’валиан дилибкIуз чарйир агури, мадар апIури гъахьну.

Ражабяли ва Залиха Къурбанялиевариз Аллагьди 10 бицIир тувну: 8 байна 2 риш. Хизан лап аьхюб вуйи, гьаддиз ипIруб гьарган гьудрубкIри шуйи. Залиха Шихсефиевна дявдин вахтна батагъандихъ лихури гъахьну, гъанавар ер-ккузра гъушну. Гьацира дугъу, хьайин атIнар дургъну, дурар эскрариз хътаури шуйи. Думу вахтари ипIру хураг гизафси укIануб вуди гъабхьну, вахт-вахтарик дяхнин, сурслин ктахьу кIулар уч апIуз думу хутIларизра гъягъюри шуйи.

Дявдиъ гюлле кубкIну, дугъан жилир Ражабяли гъулаз хъадакну гъюру ва хпирихъди чпин уьмур ккабалгуз хъюгъру. Садпи йисари гизаф читинди вуйи, хъа вушра дурари чпин хизан яваш-явашди ликриин апIуру. Ражабялди марччлихъанвалин пише дибисну, чан хизандиз ипIруб гъазанмиш апIури гъахьну. Залиха гизаф йисари ЧIиллихъ гъулаъ дояркади, хъасин халачачидира гъилихну. Яваш-явашди дурарин уьмур ужувлахъинди илтIибкIуру. БицIидарра аьхю шулу ва дурари чпин хизанарра ккергъру.
Залиха бабаз 56 худул ва 2 гудул а. Дугъу гъира чан баяр-шубариз, худлариз, гудлариз насигьятар, тербия туври ими.

Му кас гьарган дугъривал ккунир вуйи, кучIлар апIрударин маш ккайир дайи, гъира гьаци ами. Гьамус, жилир кечмиш гъахьиган, думу чан бицIинур бай Мюгьюдиндин хизандихъди яшамиш шула, ва дугъаз чан худлар лигура. Сар худли швушвра гъахну, дугъан швушву Залиха бабаз лап дикъатлуди хъайивал апIура. Му касди чан вари уьмур бицIидар бадали хъапIну, ва гъи дурари бабан улихь чпин бурж намуслуди ктипура.

Залиха Шихсефиевна Игит-баб, зегьметнан ветеран ву. 2005-пи йисан дугъаз «Аьхю дявдин ветеран» ччвурра тувну.

Залиха Шихсефиевна Къурбанялиевайиз хъана ярхи уьмур ккун апIурхьа.

Оцените материал
(3 голосов)
Последнее изменение Суббота, 04 января 2020 18:14