Дицдар угърашари инсанариз кьабул шлусдар кучIлин мялуматар хътаури шулу; дурари тIалаб апIурайи шартIар рягьтидар ва хайирлудар вуди шулу. Угърашари зенгар апIури, хайирлу шартIариинди кредит гъадабгъуз алдатмиш апIури шулу. Дурари сифте фитхъан-вуш пул тувуб лазим ву кIури, думу карточкайихъна хътапIуб тIалаб апIуру. Мисалназ, учвуз кредит тувуз къарар адабгъну, анжагъ ичв региондиъ ич вакилвал адруган, комиссияйин пул тувну ккунду, ясана, кредит тувбан бадали, страховка дапIну ккунду ва дидхъан пул тувуб лазим ву. Дидин кьадар кредитдин пуликан 1,5 процент вуди шулу. Пулра кIуруш, хъугъ’вал хьпан бадали, саб фунуб вуш  аьхю банкдин счетназ хъадапI кIуру. Гьаддин кьяляхъ хъана жара касари зенгар апIури, гьар жюре кучIлар апIури, хъана пул хътапIуб тIалаб апIуру, мисалназ, кредитка хътапIуз ва гь.ж. Пул чпихьна рубкьиган, дурар аьлакьайиан дургуру.

КучIлин банк фици аьгъю апIуз шулу?

Сифте дурарин сайтдиз фикир тувай, хъасин – лицензияйиз. Дурарин лицензияйиъ улупнайи банк Урусатдин Центробанкдин сиягьнак каш-ктарш, ахтармиш апIуз шулу. Сайтдин адрес гьякьлу банкдин адресдихъна гъубшуб шулу, хъа амма сайтдин ери лап аскануб, бязи разделар зат арццузра даршдар, саспи лазим вуйидар – затра адарди шулу.

Жвув фици дурарихьан уьрхюру?

1. Банкдин лицензия ЦБ-йин сиягьнак ахтармиш дапIну ккунду.
2. Жвуван хусуси мялуматар шлихьна вушра тувну ккундар.
3. КIваинди гъибтай, гьякьлу банкди жара банкдианмина пул хътапIуб саб вахтнара тIалаб апIидар, учвра - картайин счетдианмина.