Дагъустан Республикайин статистикайин гъуллугъну официально улупнайи мялуматариинди, республикайиъ 900 агъзуртIан артухъ малар ва 5 миллионна 600 агъзурихьна чарв-йир а кIури, 15-пи ноябриъ «Дагъустан» РИА-йиъ кIули гъубшу пресс-конференцияйиъ Дагъустандин ветеринарияйин комитетдин председатель Мягьямед Шапиевди мялум гъапIну.
Дугъан гафариинди, ццийин йисан ккудушу 9 вазлин арайиъ республикайиъ мал-къарайик кивру 75 жюрейин уьзрариан 70 миллион кIул малар-марччарин прививкйир гъапIну. Къайд дапIну ккундуки, 70 миллион гъапиган, мал-къарайин швнуб-саб жюрбежюр уьзрариан апIурайи прививкара, жа-жаради апIурайи гьарсаб прививкара цIийикIултIан гьисабназ гъадагъура. Гьациб жюрейиинди гьисаб апIбиинди 70 миллион дубхьна. Мидланра гъайри, гьаму вахтнан арайиъ республикайиъ 4 миллионна 700 агъзур кIул малар-марччарин диагностикара дапIна.
Пресс-конференцияйиъ республикайин кIулин ветеринари, агьалйирихьинди илтIикIну, ккабхъу йишвхьан шлихьан вушра ахтармиш дапIну адру йикк ва никк масу гъададабгъувал ккун гъапIнийи.
«Дагъустандин ветеринарияйин гъуллугъчйири, лазим вуйи серенжемар кIули гъахури, мал-къарайик киврайи ящур, туберкулез, блютанг, чума ва жара тIягъвнин уьз-рариан республикайиъ айи аьгьвалат ужуди уьбхюра. Эгер гьаци дайиш, ухьхьан экспортдиз сурсат гьапIуз даршулайивали республикайин экономикайизра тясир апIуйи», – гъапну Мягьямед Шапиевди.
Алахьурайи читинваларикан улхури, дугъу къайд гъапIганси, гъи варитIан аьхю ва гъагъи месэла — гьуркIну маларин духтрар адрувал ву.
«Жигьилариз му пишейиан аьгъювалар гъадагъуз, хъа дурхну ккудубкIнайидариз, маважиб цIиб вуйивализ лигну, ляхин апIуз ккундар. Сач Дагъустандин Правительствойин кюмекниинди республикайин ветеринарарин маважиб 22% за гъапIну ва гьамусяаьт дурари, кьялан гьисабариинди, 17 агъзурилан 38 агъзуриина маважиб гъадабгъура», – хабар тувнийи Мягьямед Шапиевди.
Му серенжемдиъ Мягьямед Шапиевдиз Дербент райондин Сталин Чюллер гъул’ан вуйи фермер Назир Гьяжиэкберовдин чарвйир йихбан гьякьнаанра суал тувнийза. Дугъу мялум гъапIганси, му касдин фермайиъ айи чарвйир дидикIну гьисабназ гъадагънайидар дайи ва, гьаци вуйивализ лигну, дугъу зат прививкйирра апIури гъахьундар.
«Назирин фермайиз, дугъхьан гизаф аьрзйир гъюрайиган, узура швнуб-сабан гъушунза. Узуси Хив райондин ветеринарра дина швнуб-саб ражари душна ва арайиз гъафи аьгьвалатнахъди таниш ву. Санитарияйин гьякьнаан дугъан ферма лап кьяляхъ хъайи. Гьаддиз, баб марччарик уьзур кивну, дугъан саки вари гъапIу ччилар ва 2-3 баб-марччарра гъийихну», – аьлава гъапIну Мягьямед Шапиевди.
