Гъябгъюрайи йисан 27-пи ноябриъ Хив райондиъ Хив гъулан спортдин мектебдиъ ихь ватанагьли, «Урусатдин Игит» ччвур тувнайи генерал-майор, Луганск Халкьдин Республикайин Игит, Аь. Къадировдин ччвурнахъ хъайи ордендин кавалер ва жара медаларинна орденарин сагьиб, ЛНР-ин Халкьдин милицияйин 2-пи армияйин корпусдин командующий Эседуллагь Абачевдиз бахш дапIнайи, армияйин жюрейиинди хиларихьди кчIихбан ватанпервервалин турнир кIули гъубшну.

 

 

Турнир Дагъустан Республикайин Правительствойин, Хив райондин администрацияйин, РД-йин армияйин жюрейиинди хиларихьди кчIихбан федерацияйин, Республикайин физкультурайин ва спортдин министерствойин, РД-йин Хабаровский крайиъ айи вакилвалин ва РД-йин милли политикайинна диндин ляхнариз лигру министерствойин идарайин лишниккди тешкил гъапIнийи. Дидиъ СКФО-йин регионариан вуйи хиларихьди кчIихбаан варитIан ужударстар 200-дихьна спортсменар иштирак гъахьну.

Турнириз лигуз Халкьдин Собраниейиъ Дагъустандин Главайин вари ихтиярар айи вакил Нюсрет Уьмаров, Госдумайин депутатдин кюмекчи Гьясангьюсейн Аьбдулжелилов, Халкьдин Собраниейин депутат Сефер Аьлиев, Хив райондин глава Ярмет Ярметов, Табасаран райондин глава Мягьямед Къурбанов, Хабаровск крайиъ Дагъустан Республикайин Правительствойин вакил Бейдуллагь Исаев ва гизаф кьадар жара жавабдар гъуллугъарихь хьайи ва жямяаьтлугъ ляхин гъабхурайи ватанагьлийир ва хялар дуфнайи. Залиъ гьацира варжариинди спортдиин юкIв али тамашичйир ва дурарин арайиъ ихь Игитрин дада Угълан Абачева ва уьмрин юлдаш Наима Абачева, дурарин мирас-варис ва гъуландарра айи.

«Гъит гьарган райондин сяргьятариина гъюру рякъяр гьамци хайирлу серенжемаризна ляхнар-карариз вуйидар, табасаран халкьдин ачухъ суфра гъийинстар мяракйириз вуйидар ишри!» – гъапнийи райондин глава Ярмет Ярметовди, турнир абццри. Чан улхбаъ дугъу Игитрин дада кIулиъ ади вари, дишагьлийириз Дадйирин йигъра тебрик гъапIнийи. «Ихь веледарикан гьарган юкIв шадди дерккричву! М. Горькийдин гафар текрар апIуз ккундузуз: «Ригъ адарш – кюкю ададабшвур, мюгьюббат адарш – бахт даршул, дада адарш, дугъан тербия дархьиш, веледдикан я шаир, я игит, я намус кайи инсан даршул». Гьич сар абайизна бабаз велед уьмриан гъягъру йигъ дярябкъри!» – гъапнийи Хив райондин главайи ва хъасин турнирин асас метлеб – Украинайин аьтрафариин гъябгъюрайи хусуси метлеб айи дявдин операцияйин женгариъ ватан уьбхюри, жюрэтлуди игитвал улупурайи ихь эскрариз кюмек ва кьувват вуди, ихь сабвал улупуб вуйиваликан гъапнийи.

Гимн йивбалан ва ихь уьлкейин пайдагъ за апIбалан кьяляхъ, Луганск Халкьдин Республикайин глава Леонид Пасечникди му турнириз чухсагъул мялум апIури хъадапIнайи гьюрматнан кагъаз дилин дуфнайи вакилари гъурхнийи. Гьацира, Дадйирин йигъ тебрик апIури, Игит Эседуллагь Абачевди хъадаънайи, рамкайиъ тIаънайи чан суратар дадайихьна ва уьмрин юлдшихьна тувнийи. Кьюбиб шикларин тмуну машнак, чан уьмриъ варитIан багьа вуйи дишагьлийириз машквар тебрик апIури, Игитрин терефнаан мани гафар дидикIнайи.

Табасаран райондин глава Мягьямед Къурбановди чан улхбаъ 15-пи ноябриъ гъабхьи райондин депутатарин сессияйиъ Эседуллагь Абачевдиз «Табасаран райондин гьюрматлу ватандаш» кIуру ччвур тувбан къарар адабгъбаканра гъапнийи. «Ихь уьлкейи Украинайиъ гъабхурайи хусуси метлеб айи операцияйиъ юкьур дагъустан баяр Игитар гъахьну. Дурарикан кьюр табасаран баяр ву: Эседуллагь Абачев ва Руслан Къурбанов. Ухьу дурар саб вахтнара районариз жара апIурадархьа. Саб чIал, саб юкIв ву-йихь, ва ихь табариъ либхурайи ифи халис табасаран ифи вуйихь. Думу гьаци вуйиб гъи магьа сабсан ражари ухьу вари сатIиди айивали ва ихь кьувват кибикьнайивали субут апIура», – гъапнийи Мягьямед Къурбановди.

«Ихь ватанагьли саб бязидарси гъуллугъарихъ хъергнайир дар. Дугъу анжагъ чан Ватанди тувнайи буйругъ ва гъюнариин илипнайи буржи баркаллувалиинди тамам апIури, гьам Арменияйинна Азербайжандин, гьам Чечен Республикайин, гьам Кьибла Осетияйин ва жара операцйириъ игитвал улупну. Гъира, пис кьаст айи душмнин улихь думу кьягьялвалиинди ди-йигъна. Чухсагъул, Угълан баб, ихь уьлкейиз гьацир бай духнайи увуз! Икрам увуз ва уву тувнайи тербияйиз! Ихь миди вуйи баярира гьациб дирбаш’вал улупурайибдиин инанмиш вуза. Гъит Аллагьди хил ккивру агьларикан ишри чиб! Марцци кIваан кIураза: вари сагъ-саламатди, кIваъ гъалибвал ади ва гъюниин пайдагъ алди хизан-кюлфетарихьна гъюб кьисмат ибшри чпиз!» – ккун гъапIну Нюсрет Уьмаровди.

Турнирикан вуйи му макьалайик дугъан кьюб гафра дикIуз, узу ихь Игитрин дадайихьнара рякъ гъабгнийза. «Игитарди бабкан шлуб дар, жан бай. Дурар магьа гьамци уьмри арайиз хуру, – гъапнийи Угълан Абачевайи. Ихь район аьлимариинди, мялимариинди, шаирариинди, спортсменариинди гьарган машгьур ву. Дурар гьарур чан пишекарвалин рякъюъ игитар ву. Эседуллагьдиз дурар чан уьмриъ нумуна гъахьну. Гьаци магьа чав ктабгъу рякъ баркаллагьниинди кIули гъабхура. Дюн’яйиъ ислягьвал ибшри, кIул’ин алтIабгнайиб укIу зав ибшри, ихь гележег акуб ва нурлуб ибшри, йикIру йигъ ужуб ибшри! Ухьуз шлу игитар ва дурарин давам шлу сиягьар дявдин майднариндар даришри! Чухсагъул йиз хизан-кюлфетдин терефнаан вари иштиракчйириз! Дугъкан гьамкьандар ктибтган, гъулхган, учвра гьамшваъ телевизориан гъулхган, хъугъ, валлагьи, бай хабариъ архьси гъабхьнийзуз», – ЮкIв сикинди адру бабу му гафар, нивгъар марцц апIури, кIурайи.

КIули гъубшу турнириз фициб кьимат тувраш, чан фикир пуб ккун апIури, Хив райондин спортдин мектебдин директорин заместитель, лайикьлу тренер Мяриф Мягьямедовдихьна илтIикIнийза. «Фукьан вушра шад вуза гъийин турнириин. Мициб жюрейин серенжем ихь райондиъ сабпи ражари кIули гъубшну гъапишра, узу гъалатI даршул. Гъит, аргъаж шулайи веледариз ихь игитар аьгъю ишри! Чухсагъул пуз ккундузуз вари тешкилатчйириз, райондин администрацияйиз гъи гьамциб турнир гъабхбан бадали зурба, кьюб мертебайин, манишин айи бассейн ва жандак жибкIру йишвар хъайи спорткомплекс дапIнайивализ. Йиз фикриан гъийин йигъан вари терефариан ккабалгнайи мициб зал айивал – райондиъ жигьиларин аьхю бахт ву. Ва дурар дина жалб апIузра гьамус гьииди ву. Гъит аргъаж шулайи насларин сагъламвал уьбхбан гъаразнаъ хьуб райондиъ аьдат ибшри. ЧIатан дуфнайи хяларизра гизаф адмивал улупури, гьивуб-гьадабгъуб ади, ужуб суфра албагна. Маншаллагь тешкилатчйириз вари терефариан! Гъит варитIан кIубанур гъалиб ишри!» – гъапну йиз сюгьбатчийи.

Турнириъ пешкешнан йишвар гъадагъдариз Игитрин ччвурнахъ хъайи дипломар, грамотйир, гьюрматнан кагъзар, кубокар, медалар, чIулар, пул айи конвертар, ЛНР-ин терефнаан вуйи пешкешар тувнийи.

70-75 кг гъюрударин арайиъ сабпи йишв Хив гъулан агьали Гюльмягьямед Гюльмягьямедовди гъибисну. Мидланра савайи, Хив райондиан пешкешнан йишварин сагьибар гъахьи баярра а.

Турнир Дагъустан Республикайин лайикьлу артист Марьям Къазиевайин, Дагъустан Республикайин культурайин лайикьлу гъуллугъчи Хайир Шаховдин, мяълирин устад Адият Гьямзаевайин, «БицIидарин сес» конкурсдин гъалибчи Гьямида Гьясанбеговайин мяълийириинди ва «Каспий» дестейин ялхъвнариинди ккудубкIнийи.