Декабрин 1-пи йигъан Дагъустан Республикайин Правительствойин Председатель Аьбдулмуслим Аьбдулмуслимов Табасаран райондиз гъушну.
Аьдулмуслим Аьбдулмуслимовди, Табасаран райондин глава Мягьямед Къурбановди ва РД-йин транспортдин ва рякъярин мяишатдин министр Жанбулат Салавовди машинар гъягъру Мамедгъала-Хючна рякъюн 16-28-пи километриъ гъахурайи ляхнар ахтармиш гъапIну.
Мягьямед Къурбановди къайд гъапIганси, республикайин дережайин мяна айи Мамедгъала-Хючна рякъюн 28-пи километр Табасаран ва гъунши районариз яшайишдинна экономикайин артмиш,вализ аьхю мяна айи рякъ ву. Думу рякъ Мамедгъала, КIежюх, Дарвагъ, Ярса, ТIаттил гъулариан тина гъябгъюра.
Рякъ рас апIували, Хючна-Дербент-Мягьячгъала маршруттIан, Хючна-Мамедгъала-Мягьячгъала маршрутдин манзил 34 километриинди жикъи, хъа гъунши Хив ва Агъул районариз Хючна гъул,ан тина чпин гъулариз гъягъювал 100 километриинди жикъи шулу.
Гьамусяаьт подрядчикди расвалин ляхнар графикдиъ улупнайи вахтниинди тамам апIура. Рякъюн лазим вуйи гъирагъарихъ цалар ккаъну, кьюб жар асфальт улубзувал ккудубкIна, 1,5 километр рякъ лазим вуйи къайдайиз хуз ими. Рякъ рас апIбахъди сабси рякъюн гьяракатнан хатIасузвал тямин апIбан ляхнарра гъахура. Техника жигьат рякъюн ляхнарин гьязурвали 70% тяйин апIура.
Рякъ рас апIбан ляхнар Дагъустан Республикайин «Республикайин, муниципалитетарин ва ерли аьтрафарин мяна айи машинарин рякъяр артмиш апIувал» гьюкуматдин программа уьмриз кечирмиш апIбан дахилнаъди гъахурайидар ву. Думу ляхнариз 496 миллион манат жара дапIна.
Мягьямед Къурбановди къайд гъапIганси, 2022-пи йисан аьхириз рякъюн расвалин ляхнар ккудукIну, цIийи рякъ ишлетмишвализ тувбанди ву.
Гьацира Табасаран райондиз душнайи РД-йин Правительствойин председатель Аьбдулмуслим Аьбдулмуслимов ТинитI гъулаъ 1 агъзур тонн тIумтIар, йимишар, мейвйир уьрхру йишв ачмиш апIбан серенжемдиъра иштирак гъахьну.
«Ухьу гъулариан вуйи инсанар, гъулариъ гьамцдар дараматар ачмиш апIруган, рази шулухьа. Гъуландариз лихру йишвар арайиз гъюру, гъулар артмиш хьуз хъюгъру. Уьлкейиз аькси санкцйир илитIнайи вахтнаъ, жвуван ватангьлийириз хатIасуз ипIрубдин-убхърудин тяминвал чарасуз ву», – къайд гъапIну республикайин премьер-министри.
Му проект гъулан мяишатдин «Знак» кIуру кооперативди уьмриз кечирмиш дапIнайиб ву. Склад тикмиш апIури, сад йистIан цIиб артухъ вахт гъабхьну. Проект уьмриз кечирмиш апIбаз 80 миллион манат харж гъапIну, гьаддикан 49 миллион манат гьюкуматдин субсидйир ву. Складдиъ 20 касдиз лихру йишвар ачмиш апIбанди ву.
