Ктабхъурайи йисан 14-пи декабриъ Хив райондин администрацияйиъ Афгъанистандин гьядисйирин кьягьял, Хив гъулан агьали Райсик Гьюсейновдиз хал гъадабгъуз ихтияр тувру субсидияйин шагьадатнама тувну.
Хив райондин главайин заместитель Агъамирзе Гьямзабеговди ва вахтназ вуди Хив райондиъ айи УСЗН-дин директорин вазифйир тамам апIурайи Тегран Къайибхановди, Райсик Гьюсейновдиз шагьадатнама туври, думу шаду гьядиса-йихъди тебрик гъапIнийи.
Чан улхбаъ А. Гьямзабеговди му жюрейин сертификатар, ихь республикайин Правительствойин къарарниинди, 2007-пи йисхъан мина эйсирихьна рукьурайиваликан ктибтнийи.
«2005-пи йисан 1-пи январиан мина нубатнахъ дийигънайи аба, баб хътру веледариз, инвалидариз, дявдин майднариъ гъахьи кьягьялариз, гизаф веледар айи хизанариз зиихъ улупнайи шагьадатнамйир тувра. Республикайин улихь-кIулихь хьайидари агьалйирин узу зиихъ ктуху му гъатар кIваълан гьаънадар ва дурариз жюрбежюр кюмекар тувра», – къайд гъапIнийи чан улхбаъ А. Гьямзабеговди.
