Ватандин Аьхю дявдин женгариъ Гъалибвал гъадабгъувал ихь халкьдиз лап гъагъиди алабхъну. Миллионариинди эскрар дявдин чюллериъ гъирмиш гъахьну, фронтдин далу терефнаъра гаш’валианна аьхълушнаан инсанар гьадмутIан цIиб дарди гъийихну. Аьхю шагьрар, гъулар дибдиан ккадахьну. Думу инсафсуз дявди ухьуз гъахи дарваларин кьадар гьисаб апIуз даршлубкьан аьхюб гъабхьну.
Думу йисари, ихь аьхю уьлкейин вари халкьарин вакилариси, дявдиъ гъалибвал багахь апIбак 62 хюриккжвувура чпин пай кивну. Дурарикан 46 касди дявдин чюллериъ чпин жанар дивну, хъа 16 кас, гъагъи зийнар духьну, хил хътарди, лик ккадарди, ул адарди гъулаз хътакну. Дурарра дявдиъ гъахьи зийнариан са-сарди аьхиратдиз гъушну. Гъи дурарикан сарра яшамиш шули имдар. ВаритIан кьанди Мягьямед Аьлиханов ва Кьадир Рамазанов уьмриан гъушнийи. Думу дявдиъ гъийихдариз ва, зийнар духьну, чIивиди имиди кьяляхъ гъафидариз гизаф гъулариъ гюмбтар дивнийи. Кьяляхъна йисари спонсорарин кюмекниинди саб жерге гъулариъ йирси гюмбтар цIийи алаънийи.
Ватандин Аьхю дявдин гьарсар эскер варитIан мани ва заан гафариз лайикьлу ву. Ихь ватан гъюбхю гьарсар эскер аьхю хажалатниинди ва дамагълувалиинди кIваин апIурахьа. Ухьуз, наслариз, кIваин илмиди думу эскрар чIивиди гъузди. Дурар кIваин уьрхювал ухьуз, чIивидариз, хайирлу ву.
Фашист душмнариз машна-машди дийигъну, дурар танкь апIбаъ гьунарар улупну гъийихдар, чIивиди гъузну, дявдиан кьяляхъ хътакдар кIваинди гъитбан бадали, Хюрикк гъулаъра гюмбет айи. Хючна гъулаъ яшамиш шулайи Хюрикк гъулан вакил Аьлимирза Гьясановди думу гюмбет чан хусуси дакьатарихъ цIийи алапIуз ният гъапIнийи ва Аьхю Гъалибвалин 75 йисандин юбилейиз гъябгъюрайи йисан апрель вазлин аьхириз ният кIулизра адабгънийи. Гъи гъулан варитIан гьюрматлу йишвахь дивнайи цIийи гюмбет хажалатнан ва шадвалин шагьидси дийибгъна. Думу гъулан варитIан багьалу уьмаратарикан саб ву.
Му жумарт ляхин тамам апIбаз Хюрикк гъулан жямяаьтди Аьлимирза Гьяжиевичдиз аьхю чухсагъул кIура.
Аьлимирза Гьясановдин адаш Гьяжи Фейзуллаевич Гьясановдин уьмурра Ватандин Аьхю дявдихъди сигъди аьлакьалу ву. Дугъан уьмриканна зегьметнан рякъярикан кIул’инди макьала газатдин гъюру нумрйирикан сабдиз хътапIидиза.
