Урусатдиъ коронавирусдин инфекцияйиз аькси вуди вакцинацияйин махлукьатлу кампания ккебгъна.
Къайд апIуз ккундучуз, гьеле гъубшу йисан декабриъ уьлкейиъ му прививка сабпи нубатнаъди анжагъ кьатI’иди улупнайи агьалйирин гъатарин вакиларизтIан апIуз мумкинвал адайи. Сифтена-сифте COVID-19 вирусдиз аькси прививка медицинайин цирклиъ лихурайи вакилариз, мялимариз, яшайишдин игьтияжар гьуркIру идарйириъ лихурайи гъуллугъчйириз ва гьацира сагъ апIуз даршлу уьзрар кайи ватандашариз апIури гъахьну.
Гъубшу гьяфтайиъ Урусатдин Президент Владимир Путинди министрарихъди вуйи яркьу совещаниейиъ агьалйирин вакцинация махлукьатлуди гъабхуб ва, думу серенжемар кIули гъахбан бадали, чарасуз вуди инфраструктура гьязур апIуб табшурмиш гъапIну.
Январин 15-пи йигъан уьлкейин эпидемиологарихъди вуйи сюгьбатнаъ РФ-дин вице-премьер Татьяна Голиковайи къайд гъапIганси, 2021-пи йисан 18-пи январихъан башламиш дапIну, уьлкейиъ прививкйирин яркьу кампания ккебгъра. Гьелелиг «Спутник V» вакцинайин рубар йивуз шулу, кьандиси жара препаратарра арайиз хиди. Гъийин йигъаз Урусатдиъ 1,5 миллион агьалйирин коронавирусдиз аькси привика дапIна. Му улупбарин сиягьнаъ 320 кас Дагъустандин ватандашарра а.
Гьаму йигъари Дагъустандиз COVID-19 вирусдиан аьлава вуди 3100-сана вакцинайин дозйир хъадаъна. Гьаци, гъийин йигъаз республикайиз вакцинайин 8142 доза гъахну. Зиихъ гъапиганси, улихьна вазли коронавирусдин прививка Дагъустан Республикайиъ 320 касди гъапIну. Медицинайин кIулиъ айи пишекрари къайд апIурайиганси, хатIалу вирусдихьан жвув ва багахьлуйир уьрхбаъ вакцинацияйи важиблу роль уйнамиш апIура.
Республикайиъ коронавирусдиз аькси вакцинацияйин серенжемар гъахбан бадали, РД-йин минздравди шагьрарин ва районарин больницйирин ва поликлиникйирин бинайиинди привикйир апIру 27 пункт арццну. Думу хатIалу вирусдиз аькси прививка апIру пунктарин адресар РД-йин сагъламвал уьбхру министерствойин официалин сайтдиъ, коронавирусдиз бахш дапIнайи пайнаъ улупна.
Коронавирусдиз аькси прививкайикан агьалйирин арайиъ жюрбежюр улхбар гъягъюрайивал саризра жиниб дар. Дидин гьякьнаан сагъламвал уьбхбан цирклин улихь хьайидари, агьалйир гъавриъ тIаъри, чпин фикрар ачухъ апIура.
Духтрар вакцинайин рубар чпиз йивузра рази гъахьидарикан сарпидар вуйи. Дурарин арайиъ ихь ватанагьли, Оренбург шагьрин 1-пи нумрайин клинический больницайин хирургияйин отделение кIулиъ айи духтир-хирург Мягьямедов Алауддин Рамазановичра а. Улихьна йигъари РФ-дин Президент Владимир Путинди, COVID-19-дин тIягъвнихъди женг гъабхбаъ пишекарвалин заан дережайиз ва думу ляхниъ баркаллу зегьмет зигурайивализ лигну, Алауддин Мягьямедовдиз чухсагъул мялум гъапIну. Учу дугъкан макьалара гъитибкIнийча. Ич сюгьбатнаъ вакцинацияйин важиблуваликан дугъу швнуб-саб ражари къайд гъапIнийи. Ва узу дугъан му теклифнан гафар жаради тувуз гъитнийза.
«Ич больницайиъ «Спутник V» вакцинайин рубар сарпидарди ва чпин хушниинди йивуз ккуни 13 духтир айи. Дурарикан сар узу вуйза. Гьяйифки, улихьна йигъари ковиддин вирусдиан узура аьзарлу хьпан кьяляхъ, му вакцина йивбахьан ярхла гъахьунза. Имбу 12 касди рубар гъивну. Дурарин вирусдихьна антитела арайиз гъафну. Вакцина йивбан кьяляхъ бедендин иммунный гъурулушди вирус рягьятди ккабгъра, ва дурарин сагъ’вал къайдайиъ а. Узу, духтриси, варидариз гьамциб теклиф апIураза: коронавирусди инсанар фициб гьялнахъна хураш, узу шагьид гъахьунза. Хайлин дюшюшариъ медицина кьувватсуз ву. Гьаддиз, мумкинвал аш, вакцина йивбахьан ярхла махьанай»,
– гъапну Алауддин Мягьямедовди.
Январин 21-пи йигъаз айи улупбариинди, гъубшу суткайиъ Дагъустандиъ коронавирусдиан 128 кас больницйириъ ккаъну, 150 касдин диагноз лабораторияйиъ тасдикь дапIна. Суткайин арайиъ му уьзри кьюрсана кас уьмрихъ мягьрум гъапIну.
