Июндин 8-пи, 9-пи, 10-пи, 11-пи ва 15-пи йигъари Мягьячгъала шагьриъ Республикайин ифи туврударин центриъ, вари дюн’яйин ифи туврурин Йигъаз бахш вуди, «Ифи туврурди гъуз» лишниккди тешкил гъапIу вари Урусатдин ифи туврударин гьяфтайин дахилнаъди швнуб-саб акция кIули гъушну.

 

Думу акцйир РД-йин сагъламвал уьбхбан Министерствойи, Респуб-ликайин ифи туврударин центри, вари Урусатдин «Медицинайин гъуллугъчйир – волонтерар» тешкилатдин региондин отделениейи ва РД-йин жигьиларин ляхнариз лигру Министерствойи тешкил гъапIну. Серенжемариъ «Конституцияйин волонтерар» проектдин иштиракчйири гизафси жанлувал улупну.

 

Акцияйин дахилнаъди хьуд йигъандин арайиъ чпин хушниинди ифи тувуз 400-тIан артухъ инсанар гъафнийи.

Серенжемарин жанлу тешкилатчи, РД-йин жигьиларин ачухъ правительствойин сагъламвал уьбхбан комитетдин председатель, ДГМУ-йиъ урхурайи студент риш, медицинайин гъуллугъчи – волонтер Эльмира Межидовайи къайд гъапIганси, агьалйири чпин хушниинди кми-кмиди ифи туврашра, медицинайиъ гъагъи процедурйириз чарасуз лазим вуйи ифдин биоматериалин гьаммишан кьитвал ади шулу.

«Донорвалин акцйири ва ифи тувували жигьиларин арайиъ асас йишв дибисна. Жигьилари чпин хушниинди ифи туври шулу. Ихь жигьиларин арайиъ хайлин йисари графикдин къайдайиинди ифи туврайидарра гизаф а. Ифи тувру Станцияйиз чпин хушниинди гъюрайидарин асас пайра жигьилар ву. Амма, дидиз дилигди, гъи, карантиндин шартIариъ, республикайиъ ифдин игьтияж а. Ав, ифи тувру Станцияйиъ фунуб вахтнара ифи ади шулу, амма духтрариз дидин запасар ади ккунду, мисалназ, чарасуз вуди дапIну ккуни гъагъи операцйириз»,

– гъапну Эльмира Межидовайи.

Медицинайин гъуллугъчи – волонтерин гафариинди, республикайиъ гьаму жюрейин акцйир ифи туврударин гьяракат жанлу апIувалин метлеб ади тешкил апIурайидар ву.