Дагъустандиъ коронавирус тарабгъувалихъди арайиз дуфнайи аьгьвалат яваш-явашди къайдайиз гъюра. Гьаддихъди аьлакьалу вуди, республикайин больницйир аьда- ти къайдайиинди лихуз хъюгъди. Гьаму йигъари СOVID-19 коронавирус кайи аьзарлуйириз жара дапIнайи йишвар кам апIура, фицики гьамусяаьт региондин стационарариъ му уьзриан аьзарлу гъахьидар сагъ апIбан метлебариз 4483 дахъру йишвар гьязурди а, дурарикан 2 агъзуртIан артухъ лазим шули имдар.

«Аьгьвалат яваш-явашди къайдайиз гъюра, ухьура, икибаштIан, аьдати уьмрихъна гъюрахьа. Эгер аьгьвалат гьамци гъубзиш, медицинайин хайлин идарйири, яна COVID-19 инфекция кайидар сагъ апIури гъахьи больницйири ва поликлиникйири, улихьна вахтариси агьалйир кьабул апIуз хъюгъди»,

– мялумат тувну РД-йин сагъламвал уьбхбан министр Жамалудин Гьяжиибрагьимовди.

Министрин гафариинди, гьамусяаьт Дагъустандиъ коронавирус кайи аьзарлуйир сагъ апIуз 62 больницайин бинайиин госпиталар ачмиш дапIна. Дурарикан 59 гьюкуматдин идарйир ву, имбудар – МВД-йин медсанчасть ва Буйнагъскдиъна БотIлихдиъ айи РФ-дин Миноборонайин госпиталар.

Жамалудин Гьяжиибрагьимовди къайд гъапIганси, саб жерге госпиталариъ коронавирус кайи аьзарлуйир кьабул апIувал дебккна ва душвариъ сагъ’валин курс гъабхурайи аьзарлуйирра яваш-явашди хулариз деетура. Думу больницйирин гьисабнаъ РКБ, РКБ2, РКБСМП ва Каспийск шагьрин больница а. «Вари гьаму больницйир, тIягъюн ачмиш гъабхьибси, бицIи вахтнан арайиъ коронавирусдин цIийи инфекция кайи аьзарлуйир кьабул апIру ва дурариз кюмек тувру госпиталариз илтIикIнийи. Медицинайин гъуллугъчйири думу больницйириъ COVID-19 коронавирусдиан иццру гъахьи агъзрариинди касар сагъ гъапIну», – гъапну министри.

Жамалудин Гьяжиибрагьимовди мялум гъапIганси, коронавирусдин цIийи инфекция кайи аьзарлуйир сагъ апIури гъахьи вари клиникйирин медицинайин вакиларин COVID-19 вирус каш ахтармиш апIру тестар гъадагъиди.