Дагъустан Республикайин транспортдинна рякъярин мяишатдин Министерствойи гьаму йисан 29-пи майиъ 63-пи нумрайиккди адабгъу приказдиинди, хьадан вахтна, асас вуди 15-пи июндиан 31-пи августдизкьан, гьавайин манишнан температура 32 градусдилан зина вуйи вахтна Дагъустандин аьтрафариин али саспи рякъяриан гъагъ гъабхру аьхю машинари гьяракат апIувал вахтназ вуди дебккна.

 

Гъагъ гъабхру аьхю машинари рякъяриъди гьяракат апIувал вахтназ вуди дебккнайи вахтна, дурариз йишванди сяаьт 10-диан гвачlниндин сяаьт йицIубдизкьан рякъ давам апIуз ихтияр тувна кIури, РД-йин транспортдинна рякъярин мяишатдин Министерствойин пресс-гъуллугънаан хабар тувра.

Министерствойин пресс-гъуллугънаан туврйи мялуматариинди, инсанар гъахру автобусар, гьадму гьисабнаан жюрбежюр жара шагьрариз гъягъру автобусарра, чпин тяйин дапIнайи къайдайиинди лихури гъузди. Хъа гъагъ гъабхру машинарин гьякьнаан му жюрйин уьлчмйир кьабул апIбан асас себеб, йигъандин вахтна рякъ гизаф дабгнайивализ лигну, гъагъ айи машинар гъягъруган, думу рякъяр чIур шлувалихъди, дурар рас апIру вахтна, рякъяр апIру техника рякъюъ дебккнайивал себеб вуди, жюрбежюр хатIа-балйир арайиз гъюб мумкин вуйивалихъди аьлакьалу ву. Гьаддиз гьамциб приказ адабгъна.