Табасаран райондин Куркакк гъулан советдин дахилнаъ хьуб гъул а – ЖагътIил, Вечрикк, Куркакк, СикIа, ВартатIил, хъа агьалйирин уьмуми кьадар 1850 кас ву. Гъулан советдин улихь дийигънайи вазифйирикан, гъуларин агьалйирин асас месэлйирикан ич мухбир Ражаб Нуровди Курккарин гъулан советдин администрацияйин главайин вазифйир тамам апIурайи Рамазан Казимовдихъди сюгьбат гъубхну. Думу жикъиди исихъ чап апIурача.
– Рамазан Шафиевич, Куркакк гъулан советдин жилариин швнуб социалин идарйир ал?
– Куркакк гъулан советдин аьтрафариин 1 кьялан ва 1 ккергъбан мектебар (душвариъ 200 балина шуру аьгъювалар гъадагъура), 1 библиотека, 2 ФАП, 1 бицIидарин багъ ва 1 почтайин отделение ерлешмиш духьна.
– Гъулан советдиз дахил шулайи гъуларин вакилар асас вуди фицдар ляхнариин машгъул ву?
– Аьхюну пай агьалйири мал-къара уьбхюра. Уьмуми гьисабариинди, му гъулариъ 800 кIул кIару малар, 850 чарвйир, 2600 пеэр а. Сасдар касар багълар-бахчйир артмиш апIбиин машгъул ву. Хъа гъулаъ апIру ляхин адрударра а – дурар асас вуди жара йишвариз лихуз гъягъюри шулу.
– Гъи гъулан советарин улихь дивнайи асас месэлйирикан саб – налогар уч апIувал ву. Му цирклиан фицдар хъуркьувалар айичв?
– Куркакк советдиъ 2019-пи йисан налогар уч апIбан план артухъдира кади тамам дапIна – 116%. Транспортдин налогар уч апIбаъ цIибди кьяляхъ гъузнача, гьаци вушра райондин администрацияйи учуз кюмек вуди 500 000 манат пул деебтну. Июндин ваз ккебгъубси, «Йиз Дагъустан – йиз рякъяр» кIуру программайиз асас вуди, гъуларин рякъяр лазим вуйи къайдайиз хуз кюмек апIбан бадали, Дагъустан Республикайин Правительствойин къарарниинди сач уч гъапIу транспортдин вари налогар муниципалитетариз кьяляхъ дапIна. Курккарин гъулан советдиз дахил шулайи ЖагътIларин гъулан асас кючейиъ, Вечрикк ва Куркакк гъуларин кьялан кючйириъ ООО «МР» фирмайи рякъяр рас апIбан саб хайлин ляхнар кIули духна. Мидланра гъайри, Куркккарин гъулан жямяаьтди, меценатарин кюмекниинди чпин рякъ капитально рас гъапIну. Гьадму ляхин апIбаз лигну, Куркакк гъулан советдин администрацияйи ООО «МР» тешкилатдиз, гъулан жямяаьтдиз ва гьаму ляхнин вари тешкилатчйириз аьхю чухсагъул мялум апIура. 2020-пи йисан сабпи июндиз вуйи улупбариинди, Куркакк гъулан советдин администрацияйи гьаму йисаз улупнайи налогарин 50% уч дапIна.
– Гъулан поселениейиъ чарасуз вуди гьял дапIну ккуни фицдар месэлйир айичв?
– Табасаран райондин вари гъулариъси, Куркакк гъулан советдиъра гъулариан зирзибил адабгъбан гьякьнаан аьхю читинвалар а. Дупну ккундуки, 2019-пи йисан январин эвелариан мина зирзибил гъабхувал ва тартиб апIувал «Экологи-ка» ООО-йин ляхин дубхьна. Дурарин вари тIалабар учу тамам дапIнача, гьадму гьисабнаан хъархъас абхьру контейнерар дивру йишварра албагунча. Амма 2019-пи йисандин мартдихъан мина Куркакк гъулан советдиан зирзибил адабгънадар. Думу ич кьувватариинди адабгъурача.
– Къанун уьбхру органарихъди фициб ляхин гъабхурачва?
– Табасаран райондин ОВД-йихъди къанун уьбхбан гьякьнаан сигъ аьлакьайиъди ляхин апIурача. АТК-йин месэлйир гьял апIбан бадали, Табасаран райондин пландихъди аьлакьалуди ляхин тешкил дапIнача. Куркакк гъулан советдин аьтрафариин аьдати саягъниинди ислам дин хъапIувализ къаршу удучIвурайи касарра адар. Жара йишвариан мистаз гъюрайи касарихъдира гюрюшмиш шулача, гьацира ерли жигьиларихъди тялукь сюгьбатар гъахурача.
Вари гъулариъ кIули гъахурайи ляхнар, гьял апIурайи читин месэлйир советдин депутатарихъди, гьацира яшлу касарихъди сатIиди ва мясляаьт-ниинди тамам ва гьял апIури шулуча. Мициб ляхни ужудар натижйирра туври шулу, читин месэлйир гьял апIуз лазим вуйи мумкинваларра дихъуру.
– Ццийин йисаз сарун фицдар ляхнар планламиш дапIначва?
– Ццийин йисан имбу вахтна учу штун булагъар рас, кючйиригъ гъяйи аквар дигиш апIбанди вуча. Табасаран ра-йондин РЭС-дин начальник Багьаудин ТIагьировдихъди сатIиди гъуларин кючйиригъ гъяйи аквар энергия уьбхру лампйирихъди гьюдюхюз ккача. Акварин кьувват лап зяиф вуйивализ лигну, ЖагътIил гъулаъ цIийи трансформатор дивуз зегьметар зигурача. Му месэлайин гьякьнаан учу швнуб-сабан Табасаран РЭС-диз, «Россети» ПАО-йин кIулиъ айи А. Сыщиковдиз тялукь кагъзар гъидикIнийча. Апрелин вазлиъ му тешкилатдиан учухьна комиссия гъафнийи ва дидин вакилари актар гъапIнийи, амма ляхин гьаци актарик гъубзну.
– Гъулан мяишатдин гьял фициб ву, хутIлар урзбан ляхнарикан фу пуз шулу?
– Куркакк гъулан советдиъ 147 гектар хъаъру хутIлар ишлетмиш дапIна. Гьадму гьисабнаан 20 гектариъ гьяжибугъда, 47 гектариъ картфар, 45 гектариъ йимишар, 3 гектариъ нимкъар, 32 гектариъ гизаф йисариз вуйи укIар дурзна.
– Гъи республикайиъ гъул артмиш апIбан жюрбежюр программйир ляхник кирчна. Дурариъ фициб иштирак’вал апIурачва?
– Гъулан жямяаьтдин яшайиш ужу апIбан бадали, учу «Ерли жягьтлувалар» кIуру проектдиъ иштирак шулача. Дидин дахилнаъди ЖагътIил гъулаъ спортдин бицIи майдан тикмиш апIбанди вуча.
– Чухсагъул интервью тувбаз.
Рамазан Казимов 1970-пи йисан СикIа гъулаъ бабкан гъахьну. Курккарин кьялан мектеб ккудубкIбалан кьяляхъ, думу армияйин жергйириз гъуллугъ апIуз гъягъюру. 1992-пи йисан Мягьячгъала шагьриъ ДГПУ-йин физкультурайин факультетдик урхуз кучIвру ва 1996-пи йисан думу хъуркьувалиинди ккудубкIуру. 1996-2000-пи йисари дугъу ТIюрягъ гъулан кьялан мектебдиъ физкультурайин дарсар кивру мялимди ляхин апIуру, хъа 2000-пи йисан СикIа гъулаъ ккергъбан мектебдиъ мялимди лихуз хъюгъру. 2010-2015-пи йисари СикI’арин ккергъбан мектебдиъ директорди лихури гъахьну. 2015-пи йисхъан мина Рамазан Казимовди Курккарин гъулан советдин администрацияйин главайин вазифйир тамам апIура. Гьаму муддатнаъ му касди жямяаьтдиз чарасуз лазим вуйи хайлин ляхнар тамам дапIна.
