Урусатдин сагъламвал уьбхбан циркил мюгькам апIури, медицинайин варидариз рубкьру кюмекнан гьякьнаан РФ-дин Конституцияйиъ тIаърайи цIийи дигиш’валар аьлава заминвалси гьисаб апIуз шулу.

 

Мидкан «Табасарандин нурар» газатдин журналистариз РФ-дин ва РД-йин Лайикьлу духтир, Дагъустан Халкьдин игит, Халкьдин духтир Мирзамягьямед Мягьямедовдира гъапнийи. Урусатдин ватандашарин сагъ’вал уьбхбахъди аьлакьалу вуди Урусатдин Федерацияйин Асас къанундиъ тIаърайи дигиш’валарикан чан фикрар ачухъ апIури, машгьур духтри гьамци къайд гъапIну:

«Аьхиримжи вахтна ихь уьлкейиъ хайлин дигиш’валар шула. Хъа иццру духьнайи, кюмекназ ккилигурайи инсандиз гьюрмат апIувалтIан, кюмек тувувалтIан заан ляхин хьуб мумкин дар. Ужуб терефназди вуйи дигиш’валар уьлкейин вари цирклариъ кIули гъягъюра. Сагъламвал уьбхбан цирклихъди аьлакьалуди Конституцияйиъ тIаърайи аьлава дигиш’валари инсанарин медицинайин игьтияжар гьуркIбан месэлйир мюгькам апIрувалик, медицинайин кюмекнан ери заан дережайинуб ва варидариз рубкьруб шлувалик, жямяаьтлугъдин сагъ’вал уьбхюз вари шартIар яратмиш апIрувалик, сагъу уьмур хъапIуз агьал-йириз вари шартIар арайиз хрувалик, ватандашар чпин сагъ’валихьна жавабдарвалиинди янашмиш хьапан культура тешкил апIрувалик миж кивуз гъитра»,

– гъапну Мирзамягьямед Мягьямедовди.

Халкьдин игитрин гафариинди, ихь гьюкуматдин асас девлет газ ва гъизил дар, инсанарин сагъ’вал ву.

«Сагъ’вал адарш, имбубдикан мянфяаьт ктабгъуз шлуб дар. Конституцияйиъ заан ери айи ва варидариз рубкьру пулсуз медицинайин кюмекнакан кьатI’иди дупна. Думу, гьюкмин вари циркларин гьякимаризси, регионарин ва гьадму гьисабнаан муниципалин гьякимаризра аьхю жавабдарвал хьибди.

Сагъламвал уьбхбан гъурулушдиз жара апIру финансарин дакьатар артухъ апIувалихъди сабси, дидин вари цирклариъ шлу ужуб терефназди вуйи дигиш’валар вари агьалйири гьисс апIрувалихъ хъугъуз ккундузуз, хъа асас вуди ихь Дагъустандиъ.

Узу, духтирси, РФ-дин Конституцияйиъ сагъламвал уьбхбан цирклиан тIаърайи вари аьлава дигиш’валарихъди рази вуза», – ачухъ гъапIну чан фикрар Мирзамягьямед Мягьямедовди.

Конституцияйиъ тIаърайи дигиш’валари Урусатдин вари ватандашариз туврайи медицинайин кюмекнан ери за апIиди ва думу варидарихьна рубкьувал тямин апIуз гъитди. Конституция – асас къанун ву. Дидиъ тIаърайи дигиш’валари сагъламвал уьбхбан циркил къайдайиз хибди, инсан Урусатдин фунуб йишваъ яшамиш шулашра, дугъаз медицинайин ужуб ерийин кюмек гъадабгъуз мумкинвал хьибди. Багахь гележегдиъ сагъламвал уьбхбан цирклиъ гъахьи дигиш’валарикан ухьу разиди гъузрувалик миж кивдихьа.

КIваин апIуз ккундучуз, сесер тувру йигъ 1-пи июлиз дивна.