Июндин 16-пи йигъан РД-йин Глава Владимир Васильев Мягьярамкент райондиз гъушнийи. КIваина хурача, июндин 15-пи йигъан Мягьярамкент райондин палаткйир дивнайи лагериъ гьюкуматдин сяргьятарилан улдучIвуз ихтиярназ ккилигурайи Азербайжандин ватандашаринна полицияйин гъуллугъчйирин арайиъ гъалмагъал арайиз гъафнийи.
Азербайжандин ватандашари, вахтниинди ватандиз хъадакну гъягъюз мумкинвал тувувал тIалаб апIури, къайдасузвалар ккергънийи. Къанунсуз гьяракатар дерккувал тIалаб апIурайи полицияйин гъуллугъчйириз дурари гъванар ва чпин хиликк ккахьу жара шей’ар йивуз хъюгъну. Гьамцдар дюшюшар арайиз гъювалихъди аьлакьалу вуди, ихь респуб-икайиз Азербайжандин МВД-йин министрин заместитель Сейфуллагь Саттр оглы Азимов кIулиъ айи делегация гъафну. Мягьярамкент райондиъ му дюшюш гьял апIбахъди аьлакьалу совещание кIули гъубшну.
Совещаниейиъ РД-йин вице-премьер Рамазан Жяфаровди туву мялуматариинди, Дербент райондин аьтрафариин Азербайжандин сяргьятарилан улдучIвбаз ккилигурайи 600-кьан ватандаш гъузна. «Азербайжандин гьюкмарихьан дурар вари сатIиди сяргьятарилан деетуз шуладар. Азербайжандин вице-премьер Шахин Мустафаевдихъди йитIнайи йикьрариинди, гьяфтайин арайиъ 100-130 кас сяргьятарилан деетурача. Гьаму йигъанра инсанар деетну ккундийи, амма Кулар гъулан багахь хьайи палаткйирин лагериъ айи инсанари гьязур дапIнайи сиягьниин чпи рази дарувал улупнийи. ЧпитIан кьанди мина дуфнайидар ухди деетурайиваликан улхури, рякъяр гьадатIуз хъюгъну, къайдасузвалар ккергъну. Арайиз гъафи аьгьвалат къайдайиз хпан бадали, полицияйин гъуллугъчйирин иштирак’вал лазим гъабхьну. Гьаму жюре къайдасузвалар дархьбан бадали, месэла гьял апIуз Азербайжандин делегация дуфна», – гъапнийи Рамазан Жяфаровди.
Дугъан гафариинди, къайдасузваларин натижайиъ полицияйин 6 гъуллугъчийиз зийнар гъахьну, сар больницайиъ ккаъна, имбудари хулаъ сагъ апIбан серенжемар гъахура. Гьацира Азербайжандин 5 ватандашра духтрарихьна илтIикIну. МВД-йин – 3, Погран управлениейин – 2 ва сар ватандашдин машинаризра зарарар гъахьну.
РД-йин айтIан ляхнарин министр Аьбдурашид Мягьямедовди аьлава гъапIганси, мушваъ гъуллугъ гъабхурайи МВД-йин 35 гъуллугъчи ва погрангъуллугънан 8 пишекар йишв’ин алийи. Дурариз кюмекра вахтниинди хъубкьну. Арайиз гъафи аьгьвалат жикъи вахтнан арайиъ къайдайиз гъабхнийи. Тахсир кайидар Мягьярамкент райондин отделиз гъахнийи. Дурариз РФ-дин къанундиз асас вуди жаза тувди. Азербайжан Республикайиан вуйи гъарашугъарихъди йикьрар дапIна.
Мялуматарихъ хъпехъбан кьяляхъ, Владимир Васильевди къайд гъапIганси, бязи вахтари инсанари гьякьна нягьякь къанунтIан зади дисуру. «Гьякьсузвал гъябкъю бязи инсанар, къанун чIур апIури, къайдасузвалар апIуз хъюгъру. Хъа диди жавабдарваликкан ккадаудар. Къанун чIур гъапIу гьарсар касдиз РФ-дин къанундиз асас вуди жаза тувди», – гъапну республикайин Главайи. Гьаддихъди сабси, дугъу сяргьятарилан деетбан дугъри нубат дубхьну ккуниваликанра къайд гъапIну.
Азербайжандин МВД-йин уголовный розыскдин КIулин управлениейин начальник Арзу Ариф оглу Дашдемировди Дагъустандин кIулиъ айидариз чпин ватандашар ужуди кьабул апIувализ ва шубуб вазлин арайиъ дурар республикайин аьтрафариин гъитувализ чухсагъул мялум гъапIну. «Азербайжандин халкьдиз му кюмек ва гьюрмат затра гьархидар», – гъапну дугъу.
Чан терефнаан Дагъустандин Главайира Азербайжандин терефнаан гъюрайи РФ-дин ватандашариз туврайи гьаму жюрейин кюмекназ чухсагъул мялум гъапнIу.
Дугъу асас фикир, му жюрейин дюшюшар арайиз дяргъбан бадали, инсанарихъди ляхин дубхну ккунивалин месэлайиз тувну. «Гьаму дюшюш ухьуз дарс шул кIури, фикир вуйиз. Вари халкьар ихь ляхнин гъавриъ ади ккунду. Думуган му жюрейин дюшюшар арайиз гъидар», – гъапну Владимир Васильевди.
