25-пи июндиан Конституцияйиъ дигиш’валар тIаувалихъди аьлакьалу вуйи сесер тувувал ккебгъна.

 

Дагъустан Республикайиъ сесер тувбаз 1809 участокар гьязур дапIна. Вари участокар Роспотребнадзорин тIалабариз лазим вуйи къайдайиинди гьязур, гьарсар участок 1,5 метрийин манзил ади инсанар чиб-чпин багахь даршлуганси лишанлу, ва коронавирус уьзрихьан уьрхру шей’арихъди тямин дапIна кIури, республикайин Избиркомдиан мялумат тувра. Конституцияйиъ дигиш’валар тIаъбан сесер тувувал гвачIниндин сяаьт 8 ккебгъну.

Сес тувуз гъюрайи касдин участокдиъ учIвубси сабпи нубатнаъди жандин температура ебцура. Хъасин дугъу учв вуйиб тасдикь апIурайи документ тувну Роспотребнадзори улупнайи вари санитарияйин тIалабар тамам дапIну, бюллетень гъадабгъбахъ къул дизигну хъасин Конституцияйиъ дигиш’валар тIауз «рази» вая «къаршу» вуш сес тувну ккунду.

Конституцияйиъ дигиш’валар тIаъбаан вуйи вари урусатдин сесер тувру йигъахъди аьалакьалу мялуматар агурайи касар аш, дурарихьан республикайин Избиркомдин сайтдиъ учIвну агъю апIуз шулу.