Аьхиримжи вахтари коронавирусдихъди аьлакьалу вуди сикинсуз аьгьвалат имбубсан гъизгъин апIури Урусатдиъ, гьадму гьисабнаан ихь республикайиъра телефондин аьлакьа ва интернетдин майднар ишлетмиш апIбан натижайиъ лутивалин тахсиркарвалар артухъ духьна.

 

Хив ОМВД-йин УР-дин вакил Аьбдулбасир Вердиевди субут апIурайиганси, тялукь гьяракатари, гьяйифки, Хив райондин агьалйирра сикинсуз апIбан дюшюшар шула.

– Аьдат вуйиганси, лутйири му рякъюъ асас вуди уьмуми рякъяр ишлетмиш апIура: агьалйириз зенгар апIури, дурари улупнайи касдин банкдин карточкайиин блокировка илипнайиваликан, думу дюз апIбан метлебниинди чпиз картайин пароль ачухъ апIбан ясана чпи кIурайи цифрйир кьабул апIбан теклиф дивра. Гьелбетда, дурари чпи банкдин гъуллугъчйир вуйивалра субут апIура.

Гьюрматлу ватанагьлийир, тялукь дюшюшариъ зенг гъапIуриз саб жюрейииндира жаваб мутуванай ва ичв улихь дурари диврайи теклифарихьан гьичра ярхла йихьай! Хъа нагагь учву алдатмиш гъахьиш, энгелвал дарди полицияйин гъуллугъариз хабар дебккай! Тялукь тахсиркарваларин гьякьнаан ОМВД-йин дежурный частнан 68-27-28 нумрайиз, ясана Дагъустандин сяргьятариин кьувватнаъ айи 98-48-48 ихтибарвалин нумрайиз зенг дапIну, хабар тувай. Тахсиркрар мялум апIбан, дурар жазайихьна хпан рякъюъ сатIи йихьай! – къайд гъапIну А.Вердиевди.