Ухьуз мялум вуйиси, гьаму йисан коронавирусдин тIягъюн айивализ дилигну, Гъалибвалин парад 9-пи майилан 24-пи июндиз илдипнийи. Июндин 24-пи йигъан Москвайиъ Ватандин Аьхю дявдиъ гъалибвал гъадабгъну 75 йис тамам хьпаз бахш дапIнайи парад кIули гъубшну.

 

Думу параддиъ харижи уьлкйириан дуфнайи вакиларра кади 13 агъзуртIан артухъ дявдин гъуллугънаъ айидари иштираквал гъапIну. Москвайин Уьру майдандилан тина дявдин техникайин 234 машин, гьадрарин арайиъди цIийи жюре техникайин 24 машин гъушнийи. Параддин аьхириъ 75 самолетди ва вертолетари уьлкейин кьувват улупнийи.

Мидланра савайи уьлкейин кIулин майдандилан тина Азербайжандин, Арменияйин, Белоруссияйин, Казахстандин, Киргизияйин, Молдовайин, Таджикистандин, Узбекистандин, Туркменияйин, Китайин, Монголияйин, Индияйин ва Сербияйин армияйин вакилар гъушнийи.

Июндин 24-пи йигъан Каспийскдиъра, аьхиримжи 18 йисандин арайиъ сабпи ражари, Ватандин Аьхю дявдиъ гъалибвал гъадабгъну 75 йис тамам хьувализ бахш дапIнайи дявдин парад (шиклиъ) кIули гъубшнийи. Му кьадар яркьуди Гъалибвалин парад я Каспийскдиъ, ясана Дагъустандин жара шагьрариъ затра гъабхьундайи.

Параддиз Ватандин Аьхю дявдин ветеранар, гьюрматлу хялар, Дагъустан Республикайин кIулиъ айидар, ихь улькейин азадвал гъюбхдарин насларин вакилар уч духьнайи.

Каспийскдиъ гъабхьи дявдин парад гвачIнинган сяаьт 10-диъ Урусатдин Федерацияйин ва Гъалибвалин пайдгъар хьади гъягъбалан ккебгънийи. Кьушмарин параддин командир Каспийский флотилияйин командующийин заместитель, сабпи рангдин капитан Сергей Екимов, хъа парад кьабул апIурайир Каспийский флотилияйин командующий, контр-адмирал Сергей Пинчук вуйи. Пайдагъ адабгъбан кьяляхъ жюрбежюр жюре кьушмарин дестйир гъушнийи. Параддин вахтнаъ майдандин зиин али завариъ СУ-27 дявдин истребителар ва вертолетар гъитIирхнийи. Серенжемдиъ 1,5 агъзур эскрари ва офицерари иштираквал гъапIнийи.

Корнавирус тарабгъувалин хатIа айивализ лигну, парадиз теклиф дапIнайи хялартIан артухъ тамашачйир деетундайи.

Йишвну сяаьт 11-диъ Гъалибвалин аьхю салют деебтнийи.