Июндин 23-пи йигъан уьлкейин Президент Владимир Путин ватанагьлийирихьна илтIикIнийи. Чан улхбаъ уьлкейин кIулиъ айири коронавирус тарабгънайи вахтнаъ зарар гъабхьи бизнесдиз ва ватандашариз кюмек тувбан месэлйир за гъапIнийи. Президентди улихьнаси кьабул дапIнайи аьхюну пай уьлчмйир давам апIуз, бицIидар айи хизанариз хъана пулин кюмек тувуз, НДФЛ-дин ставка за апIуз къарар адабгънийи. Жикъиди Президентдин табшуругъарикан ктибтурача.
1. Владимир Путинди сентябрин 15-пи йигъазкьан медицинайин гъуллугъчйириз ва агьалйирин яшайишдин игьтияжар гьуркIру пишекрарин маважибдиин иливнайи пул гъибтрайиваликан гъапну. Гьаддихъди сабси дурар отпускдиз гъягъруган, иливнайи пулра гьисабназ гъадабгъувал лазим ву.
2. 2021-пи йисан 1-пи январилан башламиш дапIну, йисандин арайиъ 5 миллион манаттIан артухъ гъазанмиш апIрударин НДФЛ-дин ставка 13 процентдилан 15 процентдиина за апIувал. Думу ставка 5 миллиондилан зиина вуйи кьадарналантIан алдабгъидар. Владимир Путинди къайд гъапIганси, диди бюджетдиз 60 миллиард манаткьан хибди. Пулин дакьатар гъагъиди аьзарлу духьнайи бицIидар сагъ апIбаз, багьалу дармнар, заан технологйирин операцйир апIбан бадали, медицинайин техника гъадагъбаз харж апIиди.
3. БицIидар айи хизанариз пулин кюмек тувувал саб вазлиз давам апIуз къарар адабгъну. «Экономика улихьнаси кьувватлуди либхуз хъюбгънадар, бикарарин кьадар за дубхьна, читинвалариан удучIвнадар. Гьаддиз июлин вазлира 16 йис дубхьну адру гьарсар бицIириз 10 агъзур манат аьлава вуди тувди. Гьаму кюмек Урусатдин 28 миллион бицIидар айи хизанариз кайиб ву», – гъапну Президентди.
4. БицIидар айи хизанариъ абйир-бабар ляхин дарди гъузувализ лигну туврайи бикарвалин за дапIнайи пособие июлин ва августдин вазари давам хьиди.
5. Зарар гъабхьи циркларин карханйириз туврайи льготайин кредит июнди, июлди ва августди давам хьибди. Путинди думу программайиз 100 миллиардсан манат жара апIувалин теклиф дивну. Думу пули карантин алдабгъбан кьяляхъ вахтнаъ карханйириъ экономика къайдайиз хуз мумкинвал тувди.
6. Июлин 1-пи йигълан мина регионариз жвув ляхнихъди тямин апIрудариз налогарин къайда дебккбан ихтияр тувра. Жвув ляхнихъди тямин апIру касдин статус 18 йислан ваъ, хъа 16 йислан тувру.
7. Президентди IT-цирклариъ страховой взносарин кьадар 7,6 процентдиинакьан ис, гъазанждиин илипру налог 20 процентдилан 3 процентдиина ис апIбан буйругъ тувну.
8. Владимир Путинди коронавирусдихъди женг гъабхуз регионариз хъадапIнайи пулин кьадарниин хъана пул иливувал табшурмиш гъапну.
Аьхириъ В.В. Путинди Урусатдин Конституцияйиъ дигиш’валар тIаъбан гьякьнаан гъапнийи. Дугъу улихьна ражарира къайд гъапIганси, ватандашари дигиш’валарин тереф гъибисиштIан, дурар кьувватнаъ учIвидар.
