25-пи июндиъ ихь уьлкейин вари регионариъ Урусатдин Федерацияйин Асас Къанундиъ дигиш’валар тIаъбан гьякьнаан сесер тувбан ляхин ккебгъну.
КIваина хурача, Владимир Путиндин Указдиинди, РФ-дин Конституцияйиъ дигиш’валар тIаъбан гьякьнаан сесер тувру йигъ июлин вазлин садпи йигъаз дивнийи, хъа коронавирус тарабгъувалин хатIа гъубзрайивализ дилигну, вари ватандашар сад йигъан участокдиъ уч дархьбан бадали, сесер тувру участокар июндин 25-пи йигъхъан мина ачмиш апIуз къарар адабгъну.
Сесер тувру участокар 25-пи июндихъан мина 1-пи июлизкьан гьар йигъан гвачIниндин сяаьт миржибдихъан хябяхъдин сяаьт миржибдизкьан лихура. ЦИК-ди ва Роспотребнадзори, коронавирусдин уьзур тарабгъувалин хатIалувал цIиб апIбан бадали, марццишин уьбхбан къайдйир дивна.
Сесер тувбан бадали, Дагъустан Республикайиъ 1809 участок ачмиш дапIна. Мягьячгъалайиъ республикайин газатарин ва журналарин чапханайин хулариъ ерлешмиш дубхьнайи 1809-пи участокдин комиссияйин председатель Урузмаг Гьясановайи «Табасарандин нурар» газатдин журналистдиз ктибтганси, сесер тувру участокариъ ляхин сесер тувру касарин арайиъ 1,5-2 метр манзил ади гъубзруганси ккабалгна.
Эгер сесер туврударин кьадар аьхюб вуш, саб пай инсанар участокдин багахь марцци гьавайихь ккилигури дийигъну гъузди. Сес тувру гьарсар ватандашдин температура ебцура, хъа эгер температура лазим вуйибтIан артухъди вуш, дугъу жаради вуйи йишваъ сес тувди. Сес тувру гьарсар касдихьна маска, элжгар, саб ражари ишлетмиш апIру ручка, спиртдихъди тартиб дапIнайи салфеткйир тувра. Комиссияйин членарихьна паспорт тувувал лазим шуладар, манзилнаан улупишра чIяаьн шула.
Ватандашари сесер тувру йишвар дезинфекция апIура, марцци гьава убчIвуз унчIвар ачмишди гъитра. Сесер тувру йишваъ 15 дакьикьайиътIан артухъ вахтна гъузуз ихтияр адар.
1049-пи нумрайин сесер туврайи участокдиъ гюзчивал гъабхурайи Мягьячгъала шагьрин Ленинский райондин участокдиъ вари ихтиярар тувнайи аьхюну вакил, полицияйин подполковник Мягьямед Мягьямедовди гьамцдар мялуматар тувну:
«Гъи гвачIнинган участок сяаьт миржибдиъ ачмиш гъапIну. Вари гьязурлугвалар вахтниинди кIули духнайи. Къанун чIур апIувалар адар. Сесер тувру ватандашариз ккилигурача. Гъийин йигъан саб кьадар агьалйири сесер тувну.
Жара участокариъси, ич участокдиъра ишлетмиш гъапIу бюллютенар сейф-пакетариъ ивну, сесер ктухру вахт улубкьайизкьан гъитди. Йишвандин вахтна участок полицияйин ва Росгвардияйин гъуллугъчйирин гъаравулвализ тувра.
Сесер тувувал июлин 1-пи йигъан ерли вахтнан хябяхъдин сяаьт миржибдиъ ккудубкIиди. Конституцияйиъ тIаърайи дигиш’валарихъан агьалйирин аьхюну пайну сесер тувиш, дигиш’валар кьабул гъапIганси гьисаб хьибди», – гъапну Мягьямед Мягьямедовди.
