Дагъустандиъ ЕГЭ тувру пунктарин тешкиллувал ва техника жигьатнаан гьязурлугвал фициб къайдайиъ аш ахтармиш гъапIну.
Гьаму йигъари Дагъустандиъ, ЕГЭ тувру пунктари тешкиллувалин, технологияйин ва техникайин цирклариан Рособрнадзори улупнайи кьатI’и табшуругъариз ва теклифариз жаваб тувраш аьгъю апIбан бадали, ахтармиш’валин имтигьян гъубхну.
Ахтармиш’валин ляхниъ гьаму йисан имтигьян тувуз тешкил дапIнайи вари 67 пунктдин пишекрар иштирак гъахьнийи. Думу ляхин ученикар адарди гъубхну. Ахтармиш’валин имтигьнарин асас метлеб – эпидемиологияйин хатIасузвалин уьлчмйир уьрхювал ва арайиз гъюрайи месэлйир вахтниинди гьял апIувал ву.
“ЕГЭ тувру гьарсаб пункт-диъ санитарияйинна эпидемияйин серенжемар кIули гъухну, ва гьарсаб имтигьнин улихьра дурар гъахувал давам апIиди. Имтигьян тувуз учIвру йи-швахь санитарияйин ва эпидемияйин хатIасузвал уьбхру хусуси къайда тартиб дапIна. ЕГЭ гъабхбаъ ва думу тешкил апIбаъ иштирак шулайи вари мялимари ва жара пишекрари чпин сагъ’вал улихь ккимиди ахтармиш гъапIну. ХатIасузвал уьбхру аьлава уьл-чмйирикан улхуруш, дезинфекция апIру ва жвув уьрхру алатарра (машниин алахьру маскйир, резиндин бегьлийир) хьиди”, – гъапну РД-йин образованиейинна илимдин Министерствойин образованиейин цирклиъ ахтармишар ва гюзчивал гъабхру управлениейин начальник Гюлейбат Ибрагьимовайи.
Гъябгъюрайи йисан Дагъустандиъ 11 агъзурихьна выпускникари имтигьнар тувуз планламиш дапIна. Йисандин эвелиъ му улупбар жарадар вуйи. Республикайин мялуматар тартиб апIру центрин кIулиъ айи Аскандар Мягьямедовди къайд гъапIганси, сифте ЕГЭ тувуз гьязур шулайидарин сиягьдик 14 агъзур кас улупнайи. Имтигьян вуздик кучIвуз планламиш дапIнайидаритIан тутрувбан гьякьнаан йикьрар кьабул апIбан кьяляхъ, шубуд агъзурихьна выпускникари гьюкуматдин имтигьян тувба-ккан кIул ккадабгъну.
Гьюкуматдин саб вуйи имтигьян тувбан серенжемар гьаму йисан 3-пи июлиъ ккергъра. Думу йигъан выпускникари география, литература ва информатика дарсариан ЕГЭ тувди.
“Имтигьнар шубуб сяаьттIан артухъ вахтна гъягъюру. ИкибаштIан, гьаму вахтнан арайиъ маскйир ва бегьлийир алахьну деуз баяр-шубар мажбур шулайиваликан хайлин абйир-бабарик гъалабулугъ’вал кабхъна. Дурар сикин апIуз ккундузуз, Роспотребнадзорин ва Рособрнадзорин тIалабариъ маскйир ва бегьлийир алахьну гъузбан чарасузвал айиваликан кIурадар. Дурар гьарсар иштиракчийи чан хушниинди алахьиди. Вари пунктариъ гьава микробарихьан ва вирусарихьан марцц апIру антисептикар дивна ва имтигьнар тувуз гъафи жигьилар вари сар-сарин арайиъ саб метрна гьацI манзил ади дитди”, – къайд гъапIнийи Мягьячгъала шагьриъ имтягьян тувру 622-пи нумрайин пункт-дин кIулиъ айи Зулгьижат Аьбдулжалиловайи.
Къайд апIуз ккундучуз, Табасаран райондиъра ЕГЭ тувуз тешкил дапIнайи пунктар гьязурди а. Дурарин гьязурлугвал ахтармиш апIуз райондин глава Мягьямед Къурбанов гьаму йигъари йишвариина гъушну.
Табасаран райондин главайи къайд гъапIганси, гъябгъюрайи йисан райондиъ 230 касди ЕГЭ тувру. Дурарикан 213 гьаму йисан ва 17 кас улихьна йисари мектебар ккудуркIдар ву. ЕГЭ тувуз райондиъ 2 пункт тешкил дапIна. Саб Хючна гъулан 1-пи нумрайин мектебдин бинайиин ва кьюбпиб – Хянягъ гъулан мектебдиъ. Кьюбиб пунктариъра ахтармиш апIбан ляхин гъубхну. Думу серенжемариъ РД-йин образованиейин ва илимдин Министерствойин вакилар, ЦРБ-йин духтрар иштирак гъахьну. ЕГЭ тувуз Хючна мектебдиъ – 19, хъа Хянягъ гъулан мектебдиъ – 12 класс гьязур дапIна.
Хив райондиъ ЕГЭ тувру пукт сабтIан адар. Ич сюгьбатнаъ Хив райондин образованиейин управлениейин начальник Назаряли Тарлановди къайд гъапIганси, думу 381-пи нумрайиккди Хив гъулан мектебдин бинайиин тешкил дапIна. Хив райондиъ ЕГЭ тувру пункт гьязурди аш ахтармиш апIру серенжемар июндин вазлин 18-пи, 25-пи ва 29-пи йигъари гъухну. Пункт ЕГЭ тувбахьна вари цирклариан гьязурди а. Душваъ улихьна йисари мектебар ккудукIу жигьиларра кади 126 касди ЕГЭ тувру, дурарикан 113 выпускник гъябгъюрайи йисан мектебар ккудукIдар ву.
2020-пи йисан ЕГЭ тувру асас вахт 25-пи июлиъ ккудубкIуру. Учу газатдин гъубшу нумрайиъра мялумат тувганси, жюрбежюр себебариан имтигьян улупнайи йигъан тувуз дархьидарихьан вая тувну ккуни имтигьнар сад йигъ’ин адахьнуш, ЕГЭ резервдиз улупнайи 24-25-пи июлин йигъари тувуз мумкинвал хьибди. Мидланра гъайри, ЕГЭ-йин серенжемариъ жюрбежюр себебариан иштирак хьуз дархьидарихьан думу имтигьнар аьлава йигъари (3-пи, 5-пи, 7-пи, 8-пи авгъустдиъ) тувуз шулу.
