Ухьуз варидариз мялум вуйиганси, июндин къанна хьуддилан ккебгъну, июлин сабпи йигъ`ина гъяйизкьан РФ-дин Конституцияйиъ дигиш’валар тIаъбахъди аьлакьалу вуди сесер тувувал кIули гъубшну. Дагъустандин махлукьатлу дакьатарин хабрариан мялум гъабхьиганси, 89% ихь агьалйири, Конституцияйиъ тIаънайи дигиш`валарихъди рази вуча кIури, сесер тувнийи.
Вари Дагъустандиъ сесер тувуз гьязур дапIнайи 1809 участокдиъ COVID-19 уьзрихьан инсандин сагъламвал уьбхру шартIар заан дережайиъди ва къайдайиъди уьрхюрайи.
Гьелбетда, сесер тувуз гъач кIури, сар касдизра я илзигурайи йишв, я миннат апIурайи йишв адайи. Амма, саб бязи касари гьам гимихь, гьамсана интернет-сайтариъ, видеороликариъ апIурайи гафар-чIалари ва туврайи мялуматари кIвак гъалабулугъ’вал кипра. Мурари фу кIура гъапиш, мисал вуди хурза: «Шлиз лазим ву Конституция?», «Йиз сес узу даршра тувуншул», «Вари бегьем дубхьну, гьамус Конституцияйихъна дуфна», «Дюн`я ккадабхъура, хъа гьамрар фтихъ хъа?» ИкибаштIан, уьлкейихьна гьамцдар рафтар айи ва гьаму жюрейин гафар апIру касар айи йишваъ хъуркьувалар шулин?
Фицики ухьу гьарури, ихь пай киври, ихь уьлкейихъан жавабдарвал гъабхурахьа. Хъа мицдар рафтар айи учвухъди уьлкейихъан вуйи жавабдарваликан улхбакан фу мяна ахъа? Ихь веледариз, ухьуз гьамусяаьт читинвалар айивализ лигну, ихь уьлкейин кIулиъ айири ухьуз, ихь медицинайиз ва жара цирклариз кюмек апIура. Гьар хизандиъ айи веледдиз магьа кьюбпи ражарира йицIуд агъзур манат туврахьуз. Гъит, мицисдар дюшюшариъ ваъ, хъа дюн`я акувалиъ ади, гьар велледдиз варж агъзрариинди манатар тувуз амур апIри чаз.
Узу му гьаз кIваин апIура гъапиш, ухьуз пулин дакьатариинди кюмек апIруган, герек гъабхьи фициб дюшюшдиъ вушра ул тIапIруган, «ихь гьюкумат», «ихь уьлке», «ихь сабвал» кIурухьа… Хъа миди вуйи вахтна… Туврайи пулиз «ваъ» гъапну кIури, гьич сариканра гъеебхьундарзуз, аьхир. Уьлкейин кIулиъ айи В.В. Путиндин ушвниан утIубччвайизра, пулин дакьатарин гьякьнаан вуйи кюмекар гъадагъуз МФЦ-йин, банкарин раккнарихъ гъахьнийхьаки, лазим вуйи кагъзар агури, йишвар адауйхьа. Ватан, Руг, Халкь, Жил бадали ихь абйир-бабари гюллдихь мухур гьивнийи. Гъира дурари, уьлкейин сабвал уьбхюри, чпин сесер тувра… Ухьу гъи, ухь`ина гъурубкьубси, фици жара апIуз хъюгъра?
Абйирин тахаллус а: «Бай гъахьиган – йиз тереф, риш гъахьиган – яв тереф», кIури. Гьамус ихь арайиъра гьацдар цIиб адар. Фикир апIинай, гъи уьлкейин тму кIулиъ гъабхьиб, закур ихь хизан-кюлфетдиз, багахьлуйиризра кайиб, тясир ва ялав тувруб ву. Гьаддиз ихь уьлкейихьна вуйи рафтар халкьдин сабвал мюгькам апIуз илтIикIидихьа…
