Дагъустандин аьтрафариин СОVID-19 тарабгъувализ мумкинвал тутруврайи Оперативный штабдин 2-пи июлин гвачIнин сяаьт 10-диз вуйи мялуматариинди, республикайиъ коронавирусдин инфекцияйиан аьзарлу духьнайидарин кьадар 7968 кас ву. Аьхиримжи суткайин арайиъ 63 кас тазади аьзарлу гъахьну.

 

ТIягъюн мялум гъапIхъан мина Дагъустандиъ коронавирусдиан аьзарлу гъахьи 5902 кас сагъ гъахьну, 383 кас гъийихну.

Вари республикайиъ коронавирус кайивал аьгъю апIбан бадали, 176658 касдин тестар гъапIну, думу кьадарнакан 2474 кас гьамусяаьт имбу инсанарихьан жара дапIна.

Гьюрматлу ватанагьлийир, коронавирусдихъди вуйи аьгьвалат яваш-явашди къайдайиз гъюра. Гьаци вушра, ихтиятвал мудубганай. Гьаз гъапиш гьелилиг республикайиъ улихьна вахтариси хатIасузвал арайиз дуфнадар, уьзур инсанарин арайиъ либцури ими. Лазим дарди гизаф инсанар уч шлу йишварихьна мягъянай. Тукандиан, кючейиан гъафиган, жямяаьтлугъ транспортдиан эдеиган, дишлади хилар жикIай, ясана спирт кайи дармнихьди марцц апIинай.