Дагъустан Республикайин Гьюкуматдин председатель Артем Здуновди 8-пи июлиъ региондиъ туризм артмиш апIбан месэлйириз бахш дапIнайи видео-конференция гъубхну.

 

Конференцияйиъ асас вуди вари халкьарин «Мягьячгъала» аэропортдин пассажирарихъди аьлакьалу месэла-йиин ва цIийи рейсар арццрайивалиин дийигънийи.

Аэропортдин генеральный директор Арсен Пирмягьямедовди мялум гъапIганси, Урусатдин жюрбежюр шагьрариз самолетариъди гъягъюрайи муштарйирин кьадар йигълан-йигъаз артухъ шула. Миди республикайиъ коронавирусдихъди арайиз дуфнайи аьгьвалат къайдайиз гъюрайиваликан кIура.

«Аьхиримжи вахтна Санкт-Петербургдиз ва Москвайиз деетнайи аьлава рейсарилан ва Краснодарский крайдиз, Ростовский областдиз ва Сургутдиз вуйи рейсарилан гъайри, Мягьячгъалайиан жара шагьрариъ дидригъди Тюменьдиз, ЦIийи Уренгойиз ва Самарайиз тIирхру самолетарин рейсар ачмиш дапIна. Гьаддиз учу му регионарианра хялариз ккилигурача»,

– къайд гъапIну Арсен Пирмягьямедовди.

ЦIийи рейсар арццнайи шагьрариъ Табасаран ва Хив районариан вуйи хайлин ихь ватандашар яшамиш шула. ЦIийи авиамаршрутар арццнайивали дурариз хайлин гъулайвалар яратмиш апIиди.