Гьаму йигъари Мягьячгъала, Каспийск шагьрар ва багарихь хьайи гъулар кумру ккаънайи. Швнуд-сад йигъандин арайиъ инсанари зарарлу гьава хътабгъури гъахьну. Мициб чIуру кум абхъувалин асас себеб – Мягьячгъала шагьрихьан цIиб ярхладиси ерлешмиш дубхьнайи, 5-6 йисан зирзибил дабхьри гъабхьи урслар али жиларик цIа кабхъувал вуйи.
Думу цIа ктIубшвайиз, сабсан цIа кабхъувалин дюшюш ачмиш гъабхьну. Му ражари ихь меркездин зиихъ хъайи Тарки-Тау дагъдин ярквраъ цIа абхъну. Республикайин МЧС-динна ярквран мяишатдин Комитетдин вакилар 2-3 йигъандин арайиъ цIихъди женгнаъ гъахьну.
Ярквран мяишатдин Ко-митетдиан туву мялуматариинди, цIа кабхъу вари жилар ярквран фонднан жилар ву. Мягьячгъалайин багарихь хьайи, Къарабудагъкент райондин жилариин али урсларик цIа хъабхъувалиан 88 гектар жил гъубгну. Хъа Тарки-Тау дагъдик кабхъу цIи 45 гектар ярквраз зарар тувну.
«Тарки дагъдик кабхъу цIа ктIубшвуз аьдати транспортдиз читинди вуйи, фицики дина машинар хъаъну гъягъюз шулдайи. Арайиз дуфнайи аьгьвалат гьисабназ гъадабгъну, МЧС-дин вертолётра жалб гъапIнушра, цIа ктIубшвуз гъабхьундайи. Гьаддиз Ростовдиан гьамцдар дюшюшариъ ишлетмиш апIру Бе-200 самолетдизра дих дапIну, дидин кюмекниинди цIихъди женг гъабхуз хъюгъну. Самолётдиан 120 тонна шид улубзигантIан цIа ктIубшвундар.
ЦIа ктIубшвбан гьаму кьюбиб дюшюшариъра республикайин МЧС-дин ва ярквран мяишатдин 200-тIан артухъ вакилар, саки 30 аьдад техника иштирак гъахьну»,
– гъапнийи РД-йин ярквран мяишатдин Комитетдин кIулиъ айи Вагьаб Аьбдулгьямидовди.
Му цIийир ктIубшвбан кьяляхъ, цIа кабхъбан сабсана дюшюш Мягьячгъалайин Кировский райондиз дахил шулайи Эльтав яркврахъ ачмиш гъабхьнийи. Райондин администрацияйин ва МЧС-дин кюмекниинди думу цIа ктIубшвну.
Мидланра гъайри, республикайин ярквран мяишатдин Комитетдиан туврайи мялуматариинди, гьамусяаьт республикайин Тарумовский, Буйнакский, Сергокъала, Казбек, УнцIукIул, Къизлар ва Хив районариъ цIа кабхъувалин мумкинвал айивализ лигну, цIиз аькси вуйи асас гьязурлугвалар дапIна.
«Гъийин йигъаз республикайин 11 райондиъ цIа кабхъувалин мумкинвал айивализ лигну, цIиз аькси вуйи асас къайда тяйин дапIна. Янаки цIа хъабхъувализ аькси вуйи хъанара артухъси уьлчмийир кьабул дапIна. ЦIа кабхъувалин дюшюшар ачмиш гъахьиш, районаъ айи мешебегйирин мяишатарихъди йикьрар йитIбан гьякьнаан районарин главйирихъди гафар дапIнача.
Гьацира пуз ккундузузки, цIа хъабхъувалин аьхюбсиб пай дюшюшарин асас себеб – инсанарин ярврахьна вуйи вижнасузвал ву. Гьаддиз, рес-публикайин агьалйирихьна илтIикIну, пуз ккундузузки, гьамусяаьт, хьадан мани вахтна, яркврариз гъягъювал дебккай, цIихъди тамшир мапIанай, цIа кабхъувалин хатIалувал арайиз гъюз гъидритру уьлчмйир уьрхяй. Фицики, мициб вахтна гъапIу журумдин кьадарра, административ ва уголовный жавабдарвалра аьхюб ву»,
– аьлава гъапIну Вагьаб Аьбдулгьямидовди.
