Гьар йисан 12-пи июль ихь уьлкейиъ Урусатдин почтайин Йигъси къайд апIура. Почтайиъ лихурайи вари гъуллугъчйир думу йигъахъди тебрик апIурача. «Урусатдин почта» ФГУП-дин ляхниъ 2019-пи йисан сабпи октябрихъан мина аьхю дигиш’валар духьна. Почта акционерарин обществойиз илтIибкIну. ЦIийи къанундиинди аьхюнуб пай акцйирин эйси Урусатдин Федерация гьисаб шула. Гьамус «Урусатдин почтайи» чан ляхин агьалйирин гъуллугъар шлубкьан ухди гьуркIруганси албагна.
ЦIиб улихьнаси Урусатдин почтайин Дербентдин почтамтдиз дахил шулайи Табасаран райондин Хючна гъулаъ айи ОПС-дин начальник Мисрихан Мисрихановдихъди (шиклиъ) гюрюшмиш гъахьунза ва дугъахъди почтайин ляхин акционерарин обществойиз илтIибкIхъан мина фици албагнаш, сюгьбат гъубхунза.
– Мисрихан Гьюсейбалаевич, Урусатдин почта цIийи жюрейиинди либхуз хъюгъхъан мина, агьалйирин гъуллугъар вахтниинди гьуркIбан бадали, ичв тешкилатди чан ляхин фици албагна?
– Агьалйирин игьтияжар заан ерийиинди гьуркIбан бадали, акционерарин цIийи обществойи хайлин жара рякъярра ачмиш апIура. Хючна ОПС-диъ «Почта банк» либхуз хъюгъна. Мушваъ агьалйирихьан сберегательный счёт ачмиш апIуз, дидихъ пул хъивуз, пулар хътауз, кредит адабгъбан бадали аьрза тувуз ва жара гъуллугъар гьуркIуз шулу.
Аьхиримжи вахтна жара гьюкуматариз ва ихь уьлкейин жюрбежюр регионариз хътаъру шей’арин кьадарра артухъ гъабхьну. Агьалйирихьан «Урусатдин почтайин» отделенйириан уьлкейин вари пIипIариз посылкйир ва кагъзар хътауз, телефондиан (Сбербанкдин онлайн-приложениейин кюмекниинди) посылкайихъан кьимат тувну, думу дишлади почтайиан гъадабгъуз шулу.
– Ичв идарайин гъийин йигъазкьан гьял апIуз даршулайи месэла фициб ву?
– Ич идарайин варитIан учIру месэла – гъулариъ айи агьалйирихьна вахтниинди почта дурубкьрайивал ву. Думу месэла гьял апIбан бадали, акционерарин общество гъапIхъан тина Дербент шагьриан Табасаран райондиз гъюрайи почта, Хючна почтайизди дархиди, гъулариъ айи почтайин 14 отделенйиризди гъабхури а. Гьаци вушра, думу месэла лазим вуйи къайдайиз дубхну адар. Жиниб дар, агьалйирин терефнаан, почтальонари газатар лазим вуйи адресназ рукьурадар кIури, учухьна аьрзйир гъюри шулу. Хъа почтальонари тахсир чпин маважиб цIиб вуйивалик кипру. Гьамус почтальонарин маважиб за апIбалан кьяляхъ, дурари агьалйирихьна кагъзар ва газатар вахтниинди рукьур кIури, умуд киврача.
– Райондиъ газатариз-журналариз подписка апIбан аьгьвалат фициб ву?
– Магьа 2020-пи йисандин кьюбпи гьацIаз вуйи подписка ккудубкIну. 20-пи июлизкьан хьуб вазлиз вуйи подписка гъябгъиди, дидхъан тина юкьуб вазлиз, хъасин – шубуб, кьюб, саб вазлиз вуйи подпискйир. Сасдар идарйирин кIулиъ айидар, йисандин кьюбпи гьацIаз вуйи подписка ккудубкIурашра, гьелелиг хъергнадар.
8-пи июлиз вуйи улупбариинди Табасаран райондиъ «Табасарандин нурар» газатдиз хьуб вазлиз вуйи подписка 72 касди, гьацI йисаз – 550 касди дапIна. Мурар гьелелиг аьхиримжи улупбар дар. Подписка гъябгъюри ими.
Гьюрматлу ватанагьлийир! Ихь «Табасарандин нурар» газатдиз вахтниинди подписка апIувал ккун апIурача.
Мисрихан Гьюсейбалаевич Мисриханов 1963-пи йисан хьубпи июндиъ ТинитI гъулаъ бабкан гъахьну. 1981-1989-пи йисари дугъу Харьковдиъ автомобиларинна рякъярин институтдиъ инженервалинна экономикайин факультетдиъ урхури гъахьну. 1997-1999-пи йисари ГП «Дагавтотрансдиъ» колоннайин механикди, 2000-2001-пи йисари Табасаран райондиъ «Гарант» ООО-йин директорин заместителди гъилихну. 2001-2002-пи йисари дугъу Табасаран райондин почтайин управлениейин начальникдин заместителин, хъа 2002-2003-пи йисари «МТС» ХМУП-диъ директорин заместителин вазифйир тамам апIури гъахьну. 2003-2005-пи йисари Мисрихан Гьюсейбалаевич Табасаран райондин главайин заместителди, хъа 2005-2006-пи йисари Табасаран райондин аьтрафариин сечкйирин комиссияйин председателдира гъилихну. 2006-2012-пи йисари думу Табасаран райондин УСХ-йин аьхюнур пишекарди, 2012-2014-пи йисари Табасаран райондин гюзчивалинна гьисабнан палатайин кIакIначи пишекарди лихуру.
2019-пи йисхъан мина Мисрихан Мисриханов Урусатдин почтайин Дербентдин почтамтдин Табасаран райондин Хючна гъулаъ айи ОПС-дин начальникди лихура.
