Федералин агентствойин жигьиларин жягьтлуваларин конкурсдин гъалибчи, Дагъустан Республикайин жигьиларин ляхнариз лигру Министерствойиз дахил шулайи РД-йин «Республикайин жигьиларин центр» ГКУ-йин кIулиъ айирин заместитель Марат Рягьимов гьаму йигъари райондин Хючна гъулан культурайин Хулаъ гъуларин поселенйирин жигьиларин ляхнариз лигру агьалйирихъди гюрюшмиш гъахьну.

 

Серенжемдиъ Табасаран райондин гизаф гъуллугъар гьуркIру жигьиларин Центрин директор Рамис Рамазанов, райондин администрацияйин культурайин, спортдин, туризмдин ва жигьиларин политикайин начальникдин заместитель Садикь Уьсманов ва гъуларин жигьилар иштирак гъахьнийи. Марат Рягьимов жигьиларихъди гюрюшмиш хьпан асас себеб – гьаму йисан август, сентябрь вазари райондиъ тешкил апIуз ккайи мини-футболиан талитарин гьякьнаан гаф-чIал апIувал вуйи.

Гюрюшдиъ М.Рягьимовди къайд гъапIганси, талитариъ иштирак хьуз гьарсаб гъул’ан гьадму гъулан поселениейиъ гьисабназ гъадагънайи, пишекарвалин футболин командйириз дахил даршулайи, 14 йислан 30 йис’ина яшар духьнайи 8 касдикан ибарат вуйи команда уч апIуз шулу. Гьарсаб команда хусуси къайдайин спортивный палатдихъдира тямин апIиди, хъа гъалиб гъахьи командйириз тешкилатчйири пешкешарра тувди.