16-пи июлиъ Табасаран райондин Хючна гъулан гъирагъдихъ хъайи Ургур ччвуччвунна сар чуччун гъалайиин аьхю субботник гъабхьну. Райондин культурайин ва спортдин идарйириъ лихурайи пишекрари аьхю кевшен рукар-кюлерихьан марцц гъапIну ва жара хайирлу ляхнар кIули гъухну.

 

 

Къайд дапIну ккундуки, гъубшу субботникдин дахилнаъди Хянгъярин Рибчрарин гъирагъар гьарар-кюлерихьан, зирзибилихьан марцц гъапIну.

 

Уьлкейин вари регионарин агьалйирик аьхиримжи вахтари чIуруб-чIюрхюб дабхьру йишвар артухъ шулайивали гъалабулугъ кипра. Наанди гъилигишра, ихь уларикк сифтена-сифте ккабхьрайиб кючйириъ, рякъярин гъирагъарихъ дабхьнайи зирзибил ву. Диди ихь гъулар, шагьрар ккаъра гъапишра, кучIал даршул. Му месэла ихь республикайиъра, гьадму гьисабнаан Табасаран райондиъра, гизаф учIруди дийибгъна, амма гьял дапIну ккудубкIуз шуладар.

 

ЧIуруб-чIюрхюб лазим дару йишвахь дабхьрударихъди женг гъабхурашра, думу ляхин къайдайиъ ипуз гизаф гъагъиди ву. Гьар йисан кючйир, гъирагъ-бужагъ зирзибилихьан марцц апIбан метлеб ади, гъулариъра, шагьрариъра саб швнуб субботник тешкил апIура. Гьяйифки, арайиан цIиб вахт гъябгъяйизра, душвариъ дахьру хъархъсарин дагълар хъана аьхю шулу.

 

Ярхлаз гъягъюдархьа. Гъадабгъурхьа Табасаран райондин центр. Ухьуз аьгъюганси, Хючна гъулан кючйир думукьан яркьудар дар. Амма кючйирин гъирагъар зирзибил айи пакетарихьди «девлетлу» ву. Паркдикан гьеле улхурира дархьа. Инсанари чпин хулаъ ясана кафйириъ уч гъабхьи зирзибил, пакетариъ абхьну, паркдиъ дивру. Му ляхни ухьу уткан апIурадар. Ихь нирарин гъирагъарра зирзибили ккаъна. Бязи касари шишлариъ абхьну чпин хъархъсар машинариъди гъахури яркврариъра дахьра. Ухьу нирарин гъирагъариъ дабхьу зирзибили нир, хъа яркврариъ уч апIрубди – шид зегьерламиш апIрувализ фикиркьан туврадархьа.

 

Гъийин девриъ инсанариз читинвалар алахьура, касиб хизанарин кьадар аьхюб ву, кIуру гафар кми-кмиди ерхьури шулхьуз. Хъа аьхиримжи йисари агьалйирин яшайишдиъ уч шлу чIуруб-чIюрхюбдиз гъилигиган, дурарин дуланажагъ писди дарувал аьгъю шулу.

 

Республикайиъ багахь гележегдиъ зирзибил тартиб апIру заводар тикмиш апIуз планламиш дапIна. Хъа гьелелиг хъархъсар урслариина уч шула. Думу месэла варидариз хайир шлуганси гьял апIуз мумкинвал бихъурадар. Месэла гьял апIури имиди, ихь девлетлу кевшенар гьар йигъан яшайишдиъ уч шулайи зирзибили ккаъра. Учву саб лигай: чIурариз утIурккнайи мал-къаракьан чIурдиз гъябгъюри имдар. Дурар ярхи йигъди ихь урслариин лицури шулу. Хъа ухьу думу урслариин зирзибил ипIурайи мал-къарайин никк, йикк ишлетмиш апIурахьа. Дидкан ихь бедендиз зарар шлуваликан фикиркьан апIурадархьа, хъа, гьяйиф…