Гъи республикайин саб хайлин гъулариъ штун месэла лап учIруди улихь дийибгъна. Гьацдар гъуларикан саб Хив райондин Мажвгларин гъулра ву. Мектебдин мялимар ва бицIидарин багъдин тербиячйир, гъулан администрация ва гъулан агьалйир штун гьякьнаан швнуб-саб ражари райондин, респуб-ликайин гьякимарихьна илтIикIну. Амма гьар ражну дурар, гафарихъди тухъра ва иццидар гафариинди штухъдира тямин апIури, гьаъри гъахьну.
Гьаму йигъари Мажвгул гъулан агьалйир, мектебдин, бицIидарин багъдин ва администрацияйин вакилар Хив райондин глава Ярмет Ярметовдихьна нубатнан ражари илтIикIнийи. Му ражари главайин терефнаанра ваъ адайи, чухсагъул чаз. Дурари адабгъу къарарниинди, мектебдин гьяятдиъ ва гъулан зиихъ буругъар гъапIнийи. Амма, гьяйифки, штухьнакьан гъурукьундайи. Фицики, «Зил» машиндихьан 25 метртIан артухъ буругъ апIуз, яман учIру гъвандин жар ккайивализ лигну, удукьурдайи. Хъа жиликк шид ккадар пну, мижра ктабтIуз шуладар. Фицики, Мажвгул гъулан гъвалахъ ерлешмиш дубхьнайи Зилдикк гъулаъ 28-30 мет-рин буругъ гъапIган, шид удубчIвну, хъа Заза гъулаъ – 38-40 метриан. Яна му гьисабариз гъилигиган, 35-40 метрин буругъ апIуз удукьнийиш, Мажвгул гъулаъра шид хьуб мумукин вуйи.
Гьаци вушра, шид адар, гъибихъундар дупну, мажвглар ккебехъну гъузур пну, миж ктабтIури адарза. Диришру бализ никк тувурдар кIуруганси, ухьу ккебехъиш, архаин гъахьиш, ихь гьякимариз ухьу кIваълан гъягъюру.
Мажвгларин гъулан жямяаьтдин ччвурнахъан абйирин бинайиинди му гъул’ан вуйи ва гьамусяаьт шагьрариъ яшамиш шулайи Юзбеговарин, Ризахановарин, На-суроварин, Халиловарин, Нежефоварин, Эсрефоварин, Аьгьмедхановарин, Гьямидоварин, Нурялиеварин, Абачеварин, Маллаеварин, Астархановарин, Мирзакеримоварин, Важибоварин, Жалиловарин, Багъдаеварин, Аьбдуллаеварин, Къалабеговарин хизанарикан ва миди вуйи жара ватанагьлийирикан гьюкмин улихь-кIулихь хьайидарик гаф кабхъру касариз, абайинна бабан багъри руг, юрд, хал, гъул вуйич дупну, гьациб юкIв мухриъ ивну, му суал гьял апIуз кюмекнаъ хьувал ва чарйир агувал ккун апIураза.
«Дагъправда» газатдик Мажвгул гъулаз шид хуз 2020, 2021, 2022-пи йисариз 54 миллион манат дакьатар улупнайиваликан дупна. Амма гъул, думугандиз гъюрайи цIадлихьанра шул пну, гучIурачуз. Фицики, ич терефназди саб сяаьтна чан юкIв хъади, чIяаьн хьайиз мархь фила гъубгъуб вуш, фикриъкьан имдариз.
Мидланра савайи, Хив райондиан Халкьдин Собраниейиз депутатарди кадагънайи Нариман Асваровдихьнара ва Марат Аслановдихьнара илтIи-кIурача. Фицики, закурин йигъан алабхъу ляхин-карназ бакар шул пну, миж кади, учву ктагъруган, му гъулан агьалйирира чпин сесер тувну, ликар алдагъну, бизар гьахьну. Учвук кивнайи миж ктадабтIди, учвура ич дерднахьинди илтIикIуб ва ич дердназ дарман хьуб аьхю тIалаб вуйич.
Гъулаъ айи гьарсаб булагъдиан гьамусяаьт гъюрайиб мурглин тIулсибтIан шид дар. Шид хуз гвар хьади гъафи дишагьли, булагъдин гъаравулси, сяаьттIан артухъ душв’ин дийигъну шулу. Му сяаьтнан арайиъ булагъдиккна кьюр-шубурсана кас уч шулу. Латазди штун цIадалкьан ккадабхъури шулдар. Завариан мархьлин цIадал адрабхъри, анжагъ цIа убгъури, булагъар уркъра, ерццура.
Хъа нагагь латаъ саб гьялкьан шид уч гъабхьиш, сари думу гъазариз, тмунури – кьаран уьрдгариз, шубурпири – бистниъ кивнайи памадрарин ва арфанйирин кьянарихъ хъубзуз гъабхури шулу. Мидин кIулланра, латариь мал-къарайиз шид гъибтри адар кIури, гъулан гимийихь йикьна фигъан шулу.
Жилиин алиб дипну, завлан гъябгърубдихъ хъергру кIуруганси, буругъар апIури, исккан зина штар ккадагъуз планламиш апIура, къарарар адагъура. Планламиш гъапIну, къарарар адагъну кIури, думу жиликкан шид ккадабгъуз, гъулан кьялаз хуз гьаци гужал насосарра ккундарин? ИкибаштIан, гьацдар гужал насосариз токра ккунду. Хъа наан а дициб ток? Кьюд йигъак сабан аквар ктIушвурайиб. 55-60 йис мидиз улихьна урснайи дестгар ву, гъи дурар шак духьну улдушвура. Яна, саб гафниинди, гизаф мани гъабхьиган, дестгар рагъура, гьарин кIакIар гъутIурччвиган, буш духьнайи симар чиб-чпиин алахьура, хъа халкь, акв кабхьиган, завариз лигура. Гъул убхъру штухъ мюгьтаж дубхьна, хъа гъулаз 4 кIуру ражари вайфай (Интернет) зигури гьарайнаъ а. Думу нубатнан ражари хурaйи вайфайтIан, вайгьарай дупIну, шид зигуз гьялак гъахьнийиш, гизаф ужу шуйи. Гьаддиз, хъана кIваин апIуз ккундузуз, Заан Ярккарин гъулан зиъхъан, сивариан гъягъюрайи штун кIуларикан, гьадраризра манигъ’вал адарди, дурарин чIат-чIурдиз утIубккнайи мал-къарайиз шид убхъру кьюб латра дюз дапIну, гьадлин кIул исинди шид ктабгъиш, Мажвгул гъулаз шид шул, дарш жара чара рябкъюри адарзуз.
Йиз фикриан, Кьур’андиан вуйи му келимйир аьгъдру ва дурарихъди таниш дару кас ихь арайиъ гьеле-меле адаршул. Шид хуз ва рякъ апIуз кюмек тувру ва жан фида апIру кас женнет-агьлиси гьисаб апIура. Гъит, гьадму гьисабназ гъадабгъну, инсанар убхъру штухъди тямин апIбаз кюмек тувударча, кIуру касар ихь арайиъ зат даришри. Гьарсар касдин му ляхин-кар бадали алдабгъурайи лик, апIурайи гаф-чIал бахт кайиб, хайирлуб, Гьяждиз гъушу гьисабариан ибшри, гьюрматлу ватанагьлийир!
