Дагъустан, чIаларин гъарзун чIулси, дуствалин гъалара ву. Гьаци, мушваъ сумчIурилан зина миллетар, арайиъ сабвал, дуствал ва мясляаьт уьбхюри, швнуб-саб аьсриъ яшамиш шула. Гьамциб гвачIин-хябяхъ айи районарикан саб Хив районра ву. Магьа, район арайиз дуфну, ккудушу 85 йисандин арайиъ сабси яшамиш шулайи кьюб миллетдикан саб сес-дих гъирагъдизди гъабхьундар. Я гележегдиъра хьибдар.

 

 

Июлин 26-пи йигъ Дагъустан Республикайин Конституцияйин Йигъси тасдикь дапIна. РД-йин Конституцияйин Йигъаз бахш дапIнайи программайин дахилнаъди ва Хив райондин администрацияйин къарарниинди райондиъ саб жерге серенжемар ва мяракйир кIули гъягъиди. Гьелбетки, дурар гъахруган инсандин сагъламвал уьбхру шартIар тамам апIбаз асас фикир тувди.

Гьаци, 21-пи июлилан 26-пи июлиз манзилнан къайдайиинди «Къанун ихь уьмриъ» кIуру шиърар урхбан конкурс кIули гъябгъиди. Дидланра савайи, 22-26-пи июлиъ, мягьлийир ва гьюкуматдин идарйир Конституцияйин Йигъахьна гьязур апIури, марццишин уьбхбан, пайдагъ цIийи алапIбан ва идарйириъ Расул Гьямзатовдин гафариз вуйи гимн йивбан серенжемар кIули гъягъиди.

Райондин мектебариъ ва бицIидарин багъариъ 23-пи июлилан 26-пи июлиз республикайин Конституцияйиз бахш дапIнайи цалин газатарин, урхурайидари гъизигу шикларин выставкйир тешкил апIиди. 24-пи июлиъ 11-пи класс гъизилин медализ ккудубкIу урхурайидариз аттестатар тувди ва дурар медалариинди ва чухсагъул мялум апIбан кагъзариинди лишанлу апIиди. Гьаму йигъан яшар духьнайи живанариз паспортар тувбан мяракара гъябгъиди.

24-26-пи июлиъ «Ихь къанун» онлайн къайдайиинди ватанпервервалин мяълийир апIбан серенжемра гъабхиди.

Конституцияйин Йигъахъди аьлакьалу вари серенжемарикан мялуматар 21-26-пи июлиъ Хив райондин администрацияйин сайтдиъ, «Аку хяд» газатдиъ тувди ва «Хив ТВ» телеканалиан улупиди.

Му серенжемар заан дережайиъди кIули гъахуз райондиз ва райондин агьалйириз ужудар сяътар ва хъуркьувалар ишри.