28-пи июлиъ Каспийск шагьриъ ерлешмиш дубхьнайи «Уйташ» инвестицйирин майдандиин «Дагполимер» компанияйи зирзибиликан кьюбпи нубатнан тадарук ва полиэтилендин пленка гьясил апIру завод ачмиш гъапIну.
Завод ачмиш апIбан серенжемдиъ республикайин Глава Владимир Васильев, гьадму йигъари Дагъустандиз дуфнайи Урусатдин экономикайин армиш’валин министрин сарпи заместитель Михаил Бабич ва РД-йин Правительствойин Председатель Артем Здунов иштирак гъахьну.
Каспийск шагьрин администрацияйин пресс-гъуллугънаан тувнайи мялуматаринди, проект уьмриз кечирмиш апIбаъ ишлетмиш гъапIу 36,31 миллион манат «Дагполимер» компанияйин хусуси дакьатар ву. Заводдиъ 21 касдиз лихру йишварра ачмиш дапIна. Мушваъ йисандин арайиъ 0,5 агъзур тоннатIан артухъ пленка ва 3,6 агъзуртIан артухъ пластмасс гьясил апIуз планламиш дапIна.
Къайд дапIну ккундуки, гьамусяаьтна «Уйташ» инвес-тицйирин майдандиин, 2,07 миллиард манатдин инвестицйир жалб дапIну, 1411 лихру йишвар айи инвестицйирин 6 проект уьмриз кечирмиш апIура. Гьадму 6 проектдикан 4 проектдиз тулк дарапIди жилар тувну.
Хъа уьмриз кечирмиш апIурайи проектарин арайиъ шюшйир апIру завод, алкоголь ктру штар ва ширйир гьясил апIру завод ва гьацира йикк гьясил апIру комплекс а. 2018-1019-пи йисари моногородарин армиш’вализ кюмек туврайи фонднаан зиихъ къайд дапIнайи инвестицйирин майдандиина газна шид зигбан, канализацияйин штар гъягъру турбйир ккивбанна 2 электростанцйир дивбан ва дина рякъяр апIбан тикилишчивалин ляхнариз 550 миллион манат жара гъапIну. Вари гьаму ляхнар тамам дапIну ккудукIна.
