Шаксуз, агьалйирин гъулай яшайиш ккабалгбаъ рякъярин мюгькамвали важиблу роль уйнамиш апIура. Аьхиримжи йисари Хив райондиъ рякъярин гьякьикьат ужу алапIбан, арайиз гъюрайи читин месэлйир гьял апIбан жигьатнаан хайлин натижалу серенжемар кIули духна. Йишвариин арайиз дуфнайи гьякьикьатдиинра ухьу вари рази вухьа.

 

Ццира, хьадукраан башламиш дапIну, Хив райондиъ рякъяр рас апIбан, рякъяриин асфальт улубзбан ляхнар егинди тамам апIура.

Гьаци, улупнайи муддатнаъ ГъуштIил гъулан асас кючейиин асфальт улубзбан ляхнар кIули гъахура. Дупну ккундуки, думу рякъ «Гъунна» мягьялиъ ерлешмиш духьнайи саб жерге гъуларизра гъябгъюрайиб ву.

ГъуштIил гъул дахил шулайи «Сельсовет Чувекский» ерли поселениейин глава Сабир Гьябибовди субут гъапIганси, рякъяриин лихурайи пишекрари натижалу ляхин дапIна.

– Гъулахъ ужуб рякъ хьувал, гьелбетда, аьхю девлет ву. Республикайин эгьемият айи му рякъ капитально рас апIуз гьеле улихьна йисари хъюгънайи. Хъа ццийин йисан ГъуштIил гъул’ан тина гъябгъюрайи рякъюн 6,7-8 км. манзилнаъ асфальт улубзура. Улупнайи серенжемар «Анжипромстрой» тешкилатдин вакилари тамам апIура. Хьадан аьхирариз му ляхнар тамам дапIну ккудукIиди. Гележегдиъ улупнайи рякъ’ин Ляхла гъулазкьан асфальт улубзбанди ву, – гъапну дугъу.

 

Шиклиъ: ГъуштIил гъулан кюче