Улихьна йигъари Мягьячгъала шагьрин тарихнан музейин гъуллугъчйири Чехия гьюкуматдиан вуйи газатар уч апIурайи коллекционериз Дагъустандин «Гьякьикьат» – авар, «Ёлдаш» – къумукъ, «Илчи» – лак, «Лезги газет» – лезги, «Замана» – дарги, «Табасарандин нурар» – табасаран ва «Нур» – цIахур чIалариинди чапдиан удучIвурайи республикайин милли газатар хътаъну.

 

Дагъустан Республикайин милли чIалариинди чапдиан удучIвурайи газатар хътаувал ккун апIури, учв коллекционер Карел Фиала Фейсбук социалин сетдиан мина музейиз илтIикIну. Карел Фиала географияйин дарсар киврайи мялим ву. Дагъустандиъ гизаф миллетар сатIиди яшамиш шулайиваликан аьгъю гъабхьиган, дугъу вари миллетарин чIалариинди чапдиан удучIвурайи газатарин гъварч чахьна хътапIуб ккун гъапIнийи. Чпин нубатнаан музейин гъуллугъчйирира республикайин газатар чапдиан адагъурайи редакцйирикан чпиз кюмек апIувал ккун гъапIну. Милли чIалариинди чапдиан удучIвурайи вари газатар коллекционерихьна хътаъну.

Сабансан ражари гьамциб гьядиса 2018-пи йисанра гъабхьну. Думуган Болгария гьюкуматдиан вуйи Йордан Кирилл «Табасарандин нурар» газатдин Фейсбукдин официалин страницайиан, чахьна ихь чIалниинди чапдиан удубчIвурайи газат хътапIувал тIалаб апIури, илтIикIнийи.

Думуган Йордан Кириллихъди гъабхьи сюгьбатнаан мялум гъабхьиганси, думу касди газатар уч апIури, 40 йис вуйи. Дугъан коллекцияйиъ вари дюн’яйиан 10 агъзуртIан артухъ газатар уч дапIнайи. Гьадму гьисабнаъ 90 чIалариинди чапдиан удучIвурайи 4 агъзур ихь гьюкуматдин газатарра айи.