Гъийин девриъ харжи ляхнарси, ужудар ляхнар апIру инсанарра цIиб адар. Мидланра савайи, гьамусдин девриъ рягьимлувалин ляхин апIувал аьдатнаъ убчIвна. Яшайишдин аьгьвалат ужуди вуйи бизнесменари касибвал кайи хизанариз, аьзарлу духьнайи бицIидариз пулин кюмек апIура.
Дурари чпин уьмриъ жарадариз, жвуван багахьлуйириз, жвуван гъулаз-шагьриз, табиаьтдиз кюмек туври, гьаддиинди хайир хура. Хъа аьхю девлет адаршра, чпихьан шлу уж’валнан ляхнар апIрударин кьадар аьхюб ву. Инсанари апIру ужудар ляхнар гьарсарин кIваъ айи хияларикан, хасиятнакан асиллу шулу. Табиаьтдихъди бицIи – вахтнахъан мина багахьлуди вуйидарин юкIв уж’вал апIуз артухъси шерик шулу. Аьхю шагьрариъ тамам апIуз даршлу, уьмрин гъагъи месэлйири инсанарин кIваъ уж’валнан ляхнариз, ужудар фикрариз йишв гъибтудар. Хъа ихь бахтнаанси, жилиин ачухъ, ужуб юкIв айи инсанар гизаф ал. Дурари гьар йигъан уж’вал апIуз мумкинвал абгуру.
Жвулли гъул Табасаран райондин центрихьан ярхлади ерлемиш дубхьнайи гъул вуйиб гизафдариз аьгъя. Гъулазди гъюру асас рякъюъ, гъулан кIанакк кюгьне вахтарихъан мина иливнайи ягъли гъяд кка. Думу кьюб чарх ккайи аьхю гъяд вуйи. Гъубшу аьсрин ургцIурпи йисари гъяд абхънийи. Гъуландар райондихъди вуйи аьлакьа уьбхру машинарин рякъюхъ мягьрум гъахьнийи. КIваин илмийиз, гьадму гъяд абхънайи йисан, гъядун багахь хьайи саб ра-ццаз аьдат вуди тукандиз хру хю, шекер, ччим ва гьацдар жара итIру сурсатар хуйи. Душвхьан мина шли йицар ккитIну, шли чан кьял’инди лазим вуйи сурсатар хизандиз хуйи. Гъулан аьгьвалат лап гъагъи гъабхьнийи.
Гьюкуматдин терефнаан гъядар апIру пишекрар гъулаз гьаъну, материал хъибкIну, гъуландарин кюмекниинди мягьражарра хъади рукьан гъяд иливнийи.
Гьаддихъан мина Жвул’-арин гъяд либхура. Гизаф йисар душнашра, гъяд фициб гьялнаъ аш лигру касар лап цIибтIан адайи. Дурарра аьхю яшнан, гъулан аьгьвалатнакан фикир апIру, амма чпин кьабивализ лигну, кюмек апIуз даршлудар вуйи.
Улихьна йигъари гъулаз гъягъруган, гъядун мягьражарин рангар гъяркъиган, дина машкквар дуфнайиси, кIваз рягьят гъабхьнийиз. Гьаму ляхин гъулан жямяаьтлугъди албагнушул кIури, фикир гъапIнийза. Хъа ваъ. Му ляхин Къазанфер Сулеймановди чан чвуччвун баярихъди гъапIуб ву кIури гъеебхьиган, гьадму касдихъди сюгьбат гъубхунза.
Къазанфер Сулейманов Петропавловск-Камчатский шагьриъ дявдин гъуллугънаъ контрактдиинди лихура. «Гъулхьан ярхлади яшамиш шули, магьа 14 йис вуйиз. Жвуван багъри гъул ва гъуландар гьарган кIваинди шулиз. Гъулаъ ляхин адрувализ лигну, гьадмукьан ярхла юрдариз алдахъунзу. Жвуллиъ йиз дада Зейнабат ва аьхюну гъардаш Къурбан яшамиш шула. Гьар йисан отпуск гъадабгъиган, дадайихьна гъулаз гъюри шулча. Йиз уьмрин юлдаш Жасмина Мажвгул гъул’ан ву. Учуз сар Зейнабат кIуру ришра ачуз. Ихь веледариз жвуван багахьлуйир, майил-мадатар, тарихи аьдатар аьгъюди ужу ву, ухьу наънан вуш кIваълан дубшну ккундар.
Гъяд къайдайиз хувалин фикир ухдихъан мина кIваъ айиз. Гизаф йисари гъургъу мархьари гъяд’ина дубх-найи ругдин кьадар аьхюб вуйи. Узуз кюмек апIуз йиз гъардашдин баярра гъафну. Сифте гъяд кьуршарихьан марцц гъапIунча. Хъасин гъядухъ хъайи мягьраж уьру ва лизи ширарихьди гъабкунча. Ярхлаан гъилигиган, цIийи гъядси рябкъюру. Узу йиз ватан сабцIибкьан узкан рази гъапIнуш, йизра кIваз рягьят гъабхьну», – кIура Къазанфер Сулеймановди.
Ав, Къазанфер, увкан вари гъуландар рази гъахьну, яв ужувлан ляхниз Аллагьу Тяаьлайи аьхю сабаб бикIривуз. Эгер ихь уьмриъ гьарсар касди чахьан удукьрубсиб бицIи уж’вал апIуйиш, ихь уьмур гизаф ужуб хьибдийи.
