Августдин 2-пи йигъан Урусатдин 30 аьхю шагьрариъ вари Урусатдин жаргъувалин аьхю марафон гъабхьну. Марафондиъ иштирак гъахьи шагьрарин арайиъ Мягьячгъалара айи. Ихь республикайин меркездиъ, яна Каспийск шагьрин В.И. Лениндин ччвурнахъ хъайи кьялан майдандилан Мягьячгъалайин кьялан майдандиина 21 килиметрин манзилнаъди кIули гъубшу марафондиъ, 70 кас иштирак гъахьну.

 

Гьаму йигъан ихь ватанагьлийир, Гюгьрягъ гъулан агьалйир Шихяли, Аслан, Ямиль, Шамиль, Максим Гьяжиагъаевар Москвайиъ гъубшу гьаму марафондиъ иштирак гъахьну.

Му ражари тешкил гъапIу марафондин варитIан асасуб гьадму вуйики, вари шагьрариъ марафондин иштиракч-йир гвачIниндин сяаьт 9-диъ километрин манзилнаан 21 километрин манзилназ жаргъуз хъюгъну.

«Табасарандин нурар» газатдиз Ямиль Гьяжиагъаевди мялум гъапIганси, чпин аьхьюну гъардаш Асландин (Килиманджаро дагъдиина удучIву ихь ватанагьли) жягьтлувалиинди, дурари жаргъбан марафондиъ иштирак хьуз гьеле 3 ваз ккимиди аьрза тувнийи.

«Москвайиъ гъябгъру серенжемдиъ иштирик хьпан бадали, узу Дербентдиъ гьязур гъахьунза. Учу Кремлин гъирагъдихъди гъажаргъунча. Марафондин тешкиллувал лап заануб вуйи. Чпин арайиъ гьарсаб 1 километрин манзил ади жаргъурайидар гьевескрари далдабйирихъди къаршуламиш апIурайи. Гьадира гьарсар иштиракчийик артухъди гьевес капIуйи.

Улупнайи 21,1 километрин манзил узу 2:06:23 вахтнан арайиъ ккадапIунза. Гьамусдихъан тинара гьамцдар серенжемариъ иштирак хьуз гьаммишан гьязур вуза. Фицики, му ляхин жвуву жвув’ин гъалибвал гъадабгъурайиганси гьисаб ву», – кIура марафондин иштиракчийи.

Сюгьбатнан аьхириъ дугъу гъапиганси, гьамцдар серенжемар ихь районариъра тешкил дапIну ккундийи.