4-пи августдиъ «Дагестанская правда» газатдин редакцияйин конференцйир гъахру залиъ, Дагъустан Республикайин Правительствойин Председателин заместитель Анвар Халиловдин тIалабниинди тешкил дапIну, РД-йин жиларин девлетарин месэлйириз лигру министр Агъарягьим Кагиргьяжиевдин, РД-йин гъулан мяишатдин ва ипIру-убхъру сурсатарин министр Абзагьир Гьюсейновдин, РД-йин экологияйинна табиаьтдин девлетарин министрин сарпи заместитель Заур Римихановдин, РД-йин тикилишчивалинна архитектурайин ва ЖКХ-йин Министерствойиз дахил шулайи шагьрарин тикилишчивалинна архитектурайин Комитетдин председатель Незир Гьюсейновдин иштирак’валиинди республикайиъ гъван, гъум, кIикIил адабгъурайи карьерарин гьякьнаан вуйи конференция гъабхьну.
Мялум вуйиганси, ихь республикайиъ лихурайи карьерарин аьхюнуб пай гъулан мяишатдин жилариин ерлешмиш духьна. Гьаци вуйивализ лигну, карьерарихъди ляхин апIурайи дилаварчи касари туврайи налогарин кьадар цIиб ву, фицики думу жилар гьелелиг гъулан мяишатдин жиларин категорияйиан промышленностдин жиларин категорияйиз илтIикIнадар.
Конференция ккебгъри, Агъарягьим Кагиргьяжиевди гъапиганси, гъулан мяишатдин жилар промышленностдин категорияйиз илтIикIбан месэла вахтниинди тамам апIбаъ асас вуди алабхъурайи читинвал – думу карьерариъ ляхин апIуз ккуни дилаварчи касари лазим вуйи документар гьязур апIуз кьан апIурайивал ву, хъа муниципалитетарира мидин гьякьнаан явашди ляхин гъабхура.
«Гъи ухьу гьял апIурайи месэлайин гьякьнаан пуз ккундузузки, гъулан мяишатдин жилар промышленностдин категорияйиз илтIикIбаъ алахьурайи читин месэлйирин гьякьнаан консультация тувбаанси, лазим вуйи вари документар уч апIбаанра кюмек апIуз гьязур вуча», – гъапну министри.
Чан нубатнаъ республикайин гъулан мяишатдин ва ипIру-убхъру сурсатарин министри мялум гъапIганси, жиликкан мяданар ккадагъбиинди пуч гъахьи жилар таза алаъну ккунду.
«Ав, жиликкан мяданар ккадагъувалин ляхин гизаф гъазанж гъюру дилаварчивалси гьисаб шула. Гьаддиз му ляхниин машгъул духьнайи гьарсар кас, мяданар ккадагъуз тувнайи лицензия ккудубкIбан кьяляхъ, думу жилар гъулан мяишатдиъ ишлетмиш апIбан бадали, цIийи алаъбан ляхнар гъахуз буржлу ву.
Къайд апIуз ккундузузки, жиликк ккайи мяданар ккадагъбан промышленностдин категорияйиз илтIикIуз ихтияр адру, асас мяна ади уьрхюрайи гъулан мяишатдин категорияйин жиларра ухьуз ахьуз. Думу жиларси гьисаб апIурайидар – Каспий гьюлин гъумран гъирагъар, тумар урзурайи хутIлар ва гъулан мяишатдиъ аьшкьниинди ишлетмиш апIурайи жилар ву. Гьацдар йишвариин карьерар апIуз лицензия тувуз ихтияр адар», – мялум гъапIну Абзагьир Гьюсейновди.
Конференцияйиъ Заур Римиха-новди мялум гъапIганси, гъийин йигъаз республикайиъ лицензия адарди лихурайи карьерар сабкьан имдар. Амма, йишвандин вахтна хилихъди гъум машинариъ абхьну къанунсузди гъабхурайи дюшюшар алахьури ими. Му месэлара гьял апIбан бадали, РД-йин экологияйинна табиаьтдин девлетарин Министетствойи къанун уьбхру органарихъди сатIиди вуйи десте тешкил дапIна.
Конференцияйин аьхириъ Незир Гьюсейновди гьарсаб ккебгърайи ляхнин аьхирра фициб дубхьну ккундуш, планламиш дапIну ккун гъапну. Янаки, дугъу кIурайиганси, карьериъ ляхин апIуз ихтияр туврайи лицензия ккудубкIбан кьяляхъ, думу жилар гьаци дирчну улдучIвувал дюз дар. Гьадушварра ишлетмиш апIуз шлуганси тартиб дапIну ккунду.
