Дагъустандиъ коронавирусдин инфекция тарабгъуз хъюгъхъан мина, COVID-19 кайивал аьгъю апIбан бадали, 300 агъзуртIан артухъ инсанарин анализарин ахтармишар гъухну. Дидин гьякьнаан коронавирусдихъди женг гъабхурайи республикайин Оперативный штабди мялуматар тувра.
Штабдин улупбариинди, анжагъ 10-пи августдиъ йишван ва йигъан 2,5 агъзур кас ахтармиш дапIна, дурарикан 48 касдин анализарик цIийи коронавирус гъибихъну. Гьаци вуйиган республикайиъ коронавирусдин уьзриан аьзарлу гъахьидарин уьмуми кьадар 9,6 агъзурилан зиина удубчIвну.
«Августдин 13-пи йигъаз вуйи улупбариинди, Дагъустан Республикайиъ коронавирусдин уьзур кубчIвдарин кьадар 9861 кас ву; думу кьадарнакан 8869кас сагъ гъахьну, 464 кас кечмиш гъахьну, 22822 касдин анализар гъапIну», – дупна штабдин мялуматариъ.
Уьзур Дагъустандиъ гьяракатниинди тарабгъуз хъюгъю апрелин вазлин аьхирариъ республикайин больницйириз гьар йигъан 140-150 кас аьзарлуйир гъюз хъюгънийи. Республикайин больницйириъ аьзарлуйир ккауз йишвар гьуркIри имдайи. Гьадмуган инсанар уьзрин гъагъивалин цIибди гъавриъ гъахьнийи: кючйириъ, жямяаьтлугъ транспортдиъ, туканариъ айи инсанари, Роспотребнадзорин тIалабар тамам апIури, маскйир, элжгар алахьуз хъюгънийи. Уьлкейин аьхю шагьрариан республикайиз кюмекра гъюз хъюбгънийи. Урусатдин оборонайин Министерствойи мобильный госпиталар гьатIарццну, духтрари аьзарлуйир сагъ апIбан ляхин тешкил гъапIнийи. Гьамци, республика гъагъи уьзрихъди женгнаъ хьувализ, духтрари аьзарлуйирин кIулихъ адау йишвар-йигъариз, агьалйири чпин сагъ’вал уьбхбаз артухъси фикир тувбаз дилигну, аьзарлуйирин кьадарра йигълан-йигъаз цIиб хьуз гъабхьнийи.
Гьамус, COVID-19 уьз-рихъди аьлакьалу аьгьвалат къайдайиз гъюз цIиб вахттIан имдруган, агьалйир Роспотребнадзорин тIалабар тамам апIувалихьан хъана ярхла шула. Кючйириъ, жямяаьтлугъ транспортдиъ къар касдикан сарикьан маска алабхьури имдар. Инсанар гьарайнахъдиси аьхю сумчрариз уч шула. Саб йишв’ан тмуну йишваз гъягъювалар цIийикIултIан ккергъна.
Гьюрматлу ватанагьлийир! Уьзур кьяляхъ дубшнадар, я багахь вахтари думу терг апIузра хьибдар. Вари дюн’яйин вирусологар, аьлимар, духтрар уьзур терг апIбиин машгъул духьна. Гьеле жюрбежюр вакцинйир гьязур дапIнашра, дурар агьалйирин арайиъ ишлетмиш апIуз хъюгъритIан адар.
Ихь сагъламвал уьхбан гъаравлиъ ухьу духьну ккунду. Гизаф инсанар иштирак шлу серенжемариъ ихтиятвал апIинай, кми-кмиди хилар жикIай, машниин маска алди лицай. Багарихьди бицIидарин багъар, мектебар ачмиш апIиди. БицIидар ва жигьилар му уьзур тарабгъувалин гъаврикк ккаъну ккунду. Дурариз уьзрикан гизаф хатIа адаршра, хизандиъ айи аьхю яшнан вакилариз, инвалидарин сагъламвализ гьюрмат дапIну ккуниваликан кIваин апIинай. Гьамус хьадан мани йигъар ккудукIиган, чвлин гьавайихъди сабси коронавирусдин уьзур хъана артухъди жанлу хьуб мумкин ву. Инсандин сагъ’вал варитIан аьхю девлет вуйивал кIваълан магьарханай. Духтрарин тIалабар тамам апIинай.
