Дюзди 20 йис улихьна, августдин 12-пи йигъан Ватандин Аьхю дявдин кьяляхъ Советарин Союздин ва Урусатдин флотдин тарихдиъ варитIан аьхю бедбахтвалин гьядиса гъабхьнийи. Баренцево гьюликк, экипаждин 118 членра ади, штун кIанаккди гъябгъру К-141 «Курск» атомдин гими ккабхънийи. Думу йигъан инсанариз авария-йин гьякьнаан хабар ади гъабхьундар, ученйириъ иштирак шулайи атомоход улупнайи вахтна аьлакьайиз удудубчIвиган, хатIалу дюшюшнакан мялум гъабхьну.

 

Къутармиш апIбан операция авария хьпан хъяляхъ миржиб сяаьтналантIан ккебгъундар, варитIан харжибдикан саризра фикир апIуз ккунди гъабхьундар. Баренцево гьюлиз Кафари флотдин гимйирин десте гъафнийи. Дурарин арайиъ «Петр Великий» атомдин крейсерра айи. Морякариз кюмек тувбан бадали чарйир агури, саб гьяфтатIан артухъ гъабхьнийи. Авария гъабхьи гимийихьна августдин 20-пи йигъан Норвегияйиан вуйи, штукк ккучIвру пишекрар хъуркьнийи ва дурари штукк кабхъу гимийин шиклар гъивнийи. Дидин вари паяриъ шид убчIвнайи. Хъайигъан ВМФ-дин командованиейи К-141 «Курск» гимийин вари экипаж гъийихуваликан мялум гъапIнийи.

Думу аварияйиъ гъийихдарин арайиъ «Дагдизель» заводдин ватандаш пишекрарра айи. Гьадрарикан сар ихь ватанагьли, торпедистарин командайин старшина, Табасаран райондин Хючна гъул’ан вуйи Аьбдулкьадир Мирзаевич Ильдаровра вуйи. 2000-пи йисан Президентдин указдиинди му бедбахтвалин дюшюшнаъ гъийиху вари морякариз Кьягьялвалин орден тувну, хъа «Курскдин» командир Геннадий Лячиндиз «Урусатдин Игит» кIуру ччвур тувнийи.

Думу гъагъи авария гъабхьихъан мина магьа 20 йис гъубшну. Амма, ватандин маракьар уьрхюри, чпин жанар фида гъапIу инсанарихьна вуйи гьюрмат ихь юкIвариъ гьаргандиз гъубзди.