2020-пи йисан 13-пи сентябриъ Урусатдин Федерацияйин 83 субъектдиъ, федералин 18 субъектдин главйир ва РФ-дин 11 субъектдин паччагьлугъдин гьюкмин къанунчивалин органариз депутатар ктагъувалра кади, жюрбежюр дережйирин сечкйирин кампанйир кIули гъягъиди. Регионарин главйир ктагъувал гьаму жюрейин сечкйирин важиблу пай ву.

 

Урусатдин ЦИК-ди чан заседаниейиъ 2020-пи йисан 13-пи сентябриъ – сесер тувру саб вуйи йигъан – сечкйир, референдумар гъахруган вахт ккимиди сесер тувбан Къайда тяйин дапIна.

«Къайда федералин къанунарин бинайиинди тартиб дапIна, ва дидиъ 2020-пи йисан 13-пи сентябриъ сечкйир гъахруган вахт ккимиди сесер тувувал тешкил апIбан аьлава жюре, къайда ва вахт улупна, – мялум гъапIну Урусатдин ЦИК-дин кIулиъ айи Элла Панфиловайи. – Къайда анжагъ саб ражаритIан – сесер тувру саб вуйи йигъантIан ишлетмиш апIуз шлуб дар. Му жюрейиинди вахт ккимиди сесер тувувалин къайда Урусатдин Федерацияйин Конституцияйиъ дигиш’валар тIаъбан гьякьнаан сесер тувруган ишлетмиш гъапIнийи ва сесер тувбан иштиракчйириз кьабул гъабхьнийи».

Центризбиркомдин главайи мялум гъапIганси, му Къайдайиз асас вуди сесер тувувалин юкьуб жюре ишлетмиш апIуз хай шулу: сесер тувру йишваъ улупнайи вахтназ улихьна сес тувувал; улупнайи вахтназ улихьна жара йиш’ван сес тувувал; вахтназ улихьна яшамиш шулайи хуларин багахь сесер тувувал; сесер тувру йишв адру гъулар-йишвариъ ва транспорт гъябгъюз читинвал кайи йишвариъ сечкичйирин дестйири вахт ккимиди сесер тувувал. Вахт ккимиди сес тувувал сечкйир гъахру йигъан улихь хьайи кьюд йигъан, яна 11-пи ва 12-пи сентябриъ, кIули гъябгъиди.

Дагъустан Республикайиъра 2020-пи йисан 13-пи сентябриъ аьтрафариин ерли самоуправлениейин органариъ муниципалин 615 сечкийин кампанйир кIули гъягъиди.

Къайдайиз асас вуди, ерли самоуправлениейин органариз сечкйир гъахруган, «Мягьячгъала шагьур» шагьрин округдин районариъ (Кировский, Ленинский, Советский) сесер тувувал тешкил апIбан кьюб жюре ишлетмиш апIиди: сесер тувру йишваъ вахт ккимиди сесер тувувал ва сесер тувру йишван гъирагъдиъ улупнайи вахтназ сесер тувувал. Мягьячгъала шагьриъ вахт ккимиди сесер тувувал 11-пи ва 12-пи сентябриъ тешкил апIиди, хъа 13-пи сентябрь сесер тувбан асас йигъ хьибди.

Буйнакск, Дагъустандин Огни, Каспийск, Къизлар, Кьибла Сухокумск – 5 шагьрин округдин ва республикайин муниципалин 38 аьтрафариин ерли самоуправлениейин органариз сечкйир гъахруган, вахт ккимиди сесер тувбан гьякьнаан къарар сечкйир тешкил апIру сечкийин комиссйири кьабул апIиди.