Дагъустан Республикайиъ «Земский мялим» проект уьмрин гьяятназ кечирмиш апIури, цци кьюбпи йис ву. Гъябгъюрайи йисан думу проектдиъ иштирак шулайи касарин документар кьабул апIувал аьхирихъна гъюра. Багахь йигъари РД-йин образованиейинна илимдин Министерствойи думу проектдиинди дагълу гъулариз ва районариз ляхин апIуз гьаъру мялимар гъядягъиди.
Проектдиъ иштирак хьуз, 55 йисахьнакьан яш дубхьнайи ва ужуб тажруба айи мялимарси, педагогвалин вузар ккудукIурайи жигьиларизра теклиф апIура.
«Земский мялим» проектдин асас метлеб – республикайин гъуларин мектебариз заан пишекарвалин дережа айи мялимар жалб апIувал ву. Дидин асас шартI – проектдиъ иштирак’вал апIуз ният гъапIу мялим чаз улупу вая чав ктабгъу мектебдиъ асккан гьисаб хьуд йисан дилихну ккунду.
Конкурсдин натижайиъ гъядягъю мялимар яшамиш хьуз гъулаз гъя-гъюру, дурариз республикайин бюджетдиан гьадму гъулаъ хал дивуз вая хал масу гъадабгъуз миллион манат жара апIиди.
2019-пи йисан Дагъустандиъ «Земский мялим» проект ахтармиш апIбан къайдайиинди гьяракатнаъ ипнайи. Гъубшу йисан республикайин дагълу гъуларин мектебариъ лихуз сабишв’инди 50 мялим гъушну. Гьаму йисан РД-йин Глава Владимир Васильевди гъапIу аьхю кюмекназ ва проект федералин дережайиз адабгъуз гъабхьивализ лигну, думу уьмрин гьяятназ кечирмиш апIувализ деетру финансарин кьадарра артухъ апIуз мумкинвал гъабхьну. Цци жюрбежюр гъуларин мектебариз лихуз сабишв’инди 140 земский мялим гъягъиди.
Табасаран райондин образованиейин управлениейин начальник Аьбдусалам Гьясановди ич сюгьбатнаъ къайд гъапIганси, райондин мектебариз гизафси харижи чIалар кивру мялимар гьуркIрадар. Гьамусяаьт «Земский мялим» проектдин дахилнаъди Къужник гъулан мектебдиз харижи чIалар, урус чIал ва литература, математика, информатика ва физика кивру, «Юлдаш» ЦО-йиз ва ЦIанак гъулан мектебдиз харижи чIалар кивру мялимариз заявкйир тувна.
Му программайин дахилнаъди гъубшу йисан Табасаран райондин Бургьанкент гъулан мектебдиз харижи чIалнан ва математикайин дарсар кивру, хъа Ягъдигъ гъулан 2-пи нумрайин мектебдиз – урус чIал кивру мялимар гъафну.
Хив райондикан улхуруш, гъубшу йисан «Земский мялим» проектдиан сар мялимдира заявкйир тувундайи. Хъа, райондин образованиейин управлениейин кIулиъ айи Назаряли Тарлановди учуз туву мялуматариинди, райондин мектебариъ инглис чIалнан, математикайин, физикайин, химияйин, географияйин дарсар кивру мялимариз игьтияж а. Райондин образованиейин управлениейи гьаму дарсар кивру мялимариз заявкйир тувна.
